- Mahmuaka Chhakchhuak
CoviD hripuiin kum hnih lai min chimbuai avangin zirna lamah pawh harsatna nasa tak kan tawk a, Cell Phone hmanga inlam atanga lehkha zir te pawh kan ngai ta hial mai. Kum 2022 kan han chuankai chuan hripui leng boruak pawhin ziaawm lam a pan chho ve deuh avangin kan sorkar hruaitute chuan April 5, 2022 atanga zirna in pangngai a lehkha zir leh tan tawh turin March 29, 2022 niah chuan thuchhuah a siam ta a, Sorkar School zawng zawnga zirlai lutte chuan uniform in ang vek hak tur tih a ni bawk a. Chumai la ni loin Ro min rel sak ang che tih hla chu Assembly/ Devotion leh function dangahte tihtakzet leh urhsun taka sak ziah tur a ni. He hla hi school luh tan niah sak tur a niin hei bakah hian kartin Thawhtanni talin sak ziah bawk tur a ni.
Hetianga sorkar lam atanga thuchhuah kan hriat ang hian Mizoram puma School zawng zawngte chu April 5, 2022 niah chuan luh tan a ni tain Ro min rel sak ang che tih hla pawh chu naupangte chuan an sa rual ta thup thup mai a. Hetih lai hian sorkar School ni ve lo mimal School (Private School) te chuan he thuchhuah ang hi an zawm chiah lo nia hriat a niin hla pawh hi naupangte chuan an sa ve chiah lo ni bawka hriat a ni thung. Sorkar thuchhuaha kan hmuh angin he hla hi School naupang te hian Devotion leh function eng eng emaw an neih huna sak ziah tur a ni a, tihtakzet leh urhsun taka sak ziah tur tih a ni kher bawk a. Kartin Thawhtanni apianga sak ziah tura tih a ni a, tihluihna erawh a ni kher lo turah ngaiin ngenna lam a ni zawk mah awm e.
Kristian kan nihna ang ngeiin puipunna hmun leh kalkhawmna hlekah hi chuan hunserh hman hi a serh zinga a mei ang maia hman ve ziah a ni a, tum danga la tih ngai vak loh angin Sept. 1 – 3, 2020 chhunga Assembly House-a rorelna neih tan a nih hmain kan Legislature rualte chuan tawngtai rualna an lo nei tawh bawk a nih kha. A tlangpuiin Pathian hnena inhlanna hi urhsun taka hman tur a nih laiin keini hi chuan kan urhsun lutuk lo deuh ni hian a hriat thin a, hunserh kan hman zin tawh tehlul nen hian a hnua kan thiltih leh rorel dan nen hian a inmil leh chiah lo deuhin chunglam malsawm tlak hi a ni chiah lo thin em tihte pawh hi ngaihtuah ngai tak a ni awm e. Chulam erawh sawi thui ta rih lo ila, tuna kan sorkar School zawng zawnga tawngtaina hla kan neih ropui leh ngaihhlutawm ber ni hial Ro min rel sak ang che tih hla nena bul kan han tan ta hi sawi zui tlak tak zawk chu a ni.
He hla hi a phuahtu Pu Rokunga hian kalpah mai mai a a phuah chu a ni hauh lo tih a chiang reng a, ‘Aw nang, kan Lal, kan Pathian, I hming ropui ber se’ tiha bul a han tanna hi Pathian chawimawina niin a thluk pawh hi a mawi ngang mai. Mizote hian kum tam kristian la ni lo mah ila kawng tam takah kan kristianna kan lantir tawh thinin kan la lantir mek zel a, hmun thenkhatahte chuan kan uar lutuk mah mah em a tih theih hial zawkin a taka nunpuina lamah hian kan pachhe deuh te pawhin a hriat bawk a. Mimal inchhung leh Office hrang hranga lantir mai pawh duhtawk loin kawngpui dungah leh hmun hrang hrangahte kan kristianna chu hai theih rual lohin kan lantir thin a, kan lantir mek bawkin kan la lantir zel dawn nitein a hriat bawk. Chutiang a nih mek lai chuan tunah kan zirlaite chuan a rualin Pathian hnena inhlanna hla ropui tak mai an han sa tan ta mai hi kristiannaah pawh kan ngheh lehzual mai piah lamah a taka nunpuina lamah pawh belhchian kan dawl phah zawk ngei a rinawm.
Dik tak chuan a thluk nei ngeia hla han sak hi tupawh mai hian kan vawng rei bik ngei theuh ang a, Tirhkoh Paula’n a zinnaa a khaw tlawhte ngei pawh a thluk neia han sak chuan kan sa thei viau zel a nih hi. He hla ngei pawh hi sak chhuah theih mai piah lamah a thu ngei pawhin thinlung a hneh loh theih loh avang hian tuna Pu Rokunga hla ropui leh chhuanawm tak mai kan zirlaite’n a huhoa an han sa tan ta mai hi a hnam ang pawha thil chhinchhiah tlak tak a ni thei ang. He hla hi sawi tak angin tawngtaina leh inhlanna hla a niin ‘Lalberte lalber chuan ro min rel sak ang che’ tihte, Kan ram, kan hnam min hruaia’n, nang chauh kan thlang a che’ tihte hi kan ram hruaitute nen hian a huhoa han sak dual dual thin nita sela inpumkhatna tha tak pawh kan neih phah ngeiin a rinawm hial a ni.
A hla chang tawp berah hian ‘Chhung lam leh pawn lam hmelma, indona thleng mahse, hneh zel turin min pui la, ro min rel sak ang che’ tih a ni a. Zoram mipuite hian a hnam angin kum 1966 ah hmelma kan bei a, kan ramah indona a thleng hial a nih kha. Chutih lai chuan mizo tawh phawt tan chuan hmelma bei loa awm chu thil zahthlak tak a ni hial awm e. Mipa kum tling tawh phawt chu hmelma bei turin ramhnuai lamah an liam vek ti ila kan sawi uar kher awm lo e. Hmeichhe tan pawh awm mai mai a har a, a then ramhnuai lamah an kal laiin a then in lamah hmelma beiin an lo awm bawk a, kan thiam leh kan theihna hmun hrang hrangah hmelma beiin kan nu leh pate khan an theihna an hmang hlawm a ni. Kum 1985 hnu lamah erawh chuan silai ri kan hre tawh meuh lo a, keini hriat ve chinah chuan March 10, 2018 nia Zophai hmuna Assam Police in kan zirlaite an kah tum kha kan hriat leh hmasak ber a ni hial awm e. July 27, 2021 nia ramri hnaih lam bawka silai puak pawh chuan kan thinlung a khawih hle mai. Hetiang a nih avang hian chhung lam leh pawn lama hmelma nena indona thlengah pawh hneh zel tura Pathian hnena inhlanna neih hi keini mizo mipui zawng zawng hian kan mamawh a ni.
Hmelma hneh tih hian silai puak lam chauh niloi he hnamin hmelma kan neih chi hrang hrang, ruihhlo leh hlemhletna chi hrang hrang leh natna thleng pawhin a ni thei bawk ang a, mizo hnam tana chhiatna chi hrang hrangte hi a ni vek thei ang. Chung a hnam anga kan hmelma zawng zawngte chu do let thei turin Pu Rokunga hian he tawngtaina hla hi a phuah chhan pawh hi a ni thei awm e. He hnam hi a boral a rem lo a, he ram hi hnam dangte chim rala a awm lohna turin kan zirlai naupangte’n Ro min rel sak ang che tia hla an han sa rual ta thup thup mai hi chunglamin mal min sawm sela keini ngei pawh hian inpumkhatna tha zawk kan neihna tura hmanraw pawimawh leh tangkai tak lo ni mawlh rawh se.