April 16, 2022 tlaia thli leh ruah thawkin Kolasib district chhungah chhungkaw tam takah harsatna a thlen a. Bialtu MLA K Lalrinliana’n chhiatna thlenna hmun hrang hrangte a tlawh nghal.
District Disaster Management & Rehabilitation Branch chhinchhiah danin, Inrinni tlaia thli leh ruah thawk avanga Kolasib district-ah chenna in chhia 251 a awm a, in 31 hi luah zui tlak loh a ni.
Chhiatna tuar nasa ber, Pangbalkawnah in chhia 126 a awm a, heng zinga 27 chu luah zui tlak loh a ni a. Meidumah pawh inchhia 28 awmin, luah zui tlak loh in pakhat a awm a. Bairabi-ah in chhia 30, S.Chhimluangah 23 leh Thingtelhah in chhia pathum a awm a ni.
Kolasib khaw chhungah in chhia 41 zingah 10 chu Saidan-a thleng a ni a. Hmarveng, New Builum leh Rengtekawngah in chhia pasarih theuh a awm a, Rengtekawnah hian luah zui tlak loh in pahnih a awm a. Hmar vengah pawh luah zui tlak loh in pakhat a awmin, Vengthar leh Khuangpuilamah pali ve ve a awm bakah New Diakkawnah in pahnih a chhe bawk.
Rual tla avanga thlai chhiat dan report erawh hriat theih a la ni lo thung.
Nimin khan chhiatna tuarte chu Sub Hqrs YMA huaihawtin in chhiate siam that hnatlangpui neih a ni a. A tuar nasa ber, Pangbalkawn-a in chhiate siam that hnatlang nimina neihah Kolasib town chhung YMA branch tin atangin hnatlangah hian mi panga zel thawk chhuak tura tih a ni.
Kolasib bialtu MLA K Lalrinliana pawhin chhiatna hmun hrang hrangte a tlawh nghal a. A bial chhunga thli leh rialin a tihchhiat chenna in 200 chuang chu a hmunah kalin a tlawh chhuak a, pawisa fai leh silpouline bakah hnatlang mamawh zualpui leina tur pawisa fai a pe a. Chhiat tawkte hi a tul angin sorkarin a puih tur thu leh chief minister thurawn angin in chung chhiate pawh rangva ngaihtuahsak an nih tur thu a sawi.
Minister hi John LT Sanga, Deputy Commissioner, Kolasib leh SDC Vanlalmuana ten an tawiawm a ni.
Kolasib atanga thudawn danin Kolasib district chhung hmun tam takah thingkung tluin electric line a delh chhiat leh electric ban tlu avangte, line thenkhat insi (touch) a la awm avangten power supply pawh a khaihlak phah nasa hle.