Aizawl: Lunglei Electric Veng nula, Vanlalhmangaihzuali (30) d/o Lalrintluanga chu Aizawla a thlenna, Lushai Hills Residency Hotel-ah thia chhar a ni.
Thudawn danin Vanlalhmangaihzuali hi P&E Revenue Sub Division, Lungleia MR-a thawk lai a ni a, EO exam turin Aizawla kal a ni.
April 13 khan an venga mi tho, a thianpa nen Lushai Hills Residency Hotel-ah hian an thleng tan a, a thianpa hian April 14 zing a thawhin a hmu ta lo a, hemi ni vek hian Aizawl Police Station-ah a report.
Police-te chuan Vanlalhmangaihzuali hi ni ruk chhung an zawng hman a, nimin chawhnu khan a ruang hi hotel hnuai ber lift basement-ah hmuh a ni.
Hotel neituten an sawi danin Vanlalhmangaihzuali a awm loh hnu hian a thianpa chu hotel-ah hian zan khat a la riak a, hotel a chhuahsan dawnin a thiannu thawmhnawte chu counter-ah a dah a ni.
A ruang buaipuitute sawi danin Vanlalhmangaihzuali taksa hi a chhe tawhin, a rim pawh a na tawh hle a, a ruang an hmuhna bula dawr neite pawhin Thawhtanni lam atang khan thil rimchhe tak an lo hriat tawh thu an sawi a ni.