Cadiz in La Liga a tunhnaia che tha tluang Barcelona an barakhaih a. 1-0 in Thawhtanni zan inkhelah an hneh.
Camp Nou a inkhela an tlawm avangin Barcelona hi an mualah a zawnin an tlawm tihna a ni a. Ningani zan khan Europa League atangin an tla a. Eintracht Frankfurt in 4-3 aggregate a hneh turin 3-2 in an lo hneh tawh.
A zawna an tlawm hma hian Xavi Hernandez-a pawlte hi a zawna vawi 15 tlawm lova kaltluang lai an ni thung.
An mualah ngei Barcelona an kheltha tawk lova. An inkhel entu an fans te pawh first half-ah an lawm lo hman hle.
Second half tan tir lamah Cadiz in rin loh takin goal an khung a. Barca goalkeeper Marc-Andre ter Stegen hma a ball inchuhnaah Lucas Perez chu a vannei ah tangin goal-ah a thai lut hram.
Barcelona in goal khung tum zui viau mahse Cadiz an ding khawng tlat a. Ter Stegen-a’n an goal chhuah belh tur dan a nei nual zawk.
An coach Xavi chuan inkhel zawhah, “Chance tha kan nei a, point thum hmuh theihna tur a ni. Mahse kan hmang tangkai thei lo. Tuna kan tlukna atang hian kan thawh leh a ngai a, kan hmabak kan thlir a tul. Champions League khelpha tur dinhmunah kan ding a, heta tang hian hmalam kan pan a ngai.” a ti.