Congress-in a bial chhung hre chiang lovah Robert Romawia puh

AZL: Aizawl East II bialtu MLA Robert Romawia Royte-in Chief Minister Zoramthanga anga thiltithei leh taima hmun dangah an awm ve lo tia a sawi leh Congress president thar, Lalsawta’n Aizawl East-II huam chhungah hmalakna lian tham leh rotling tak tak a hnutchhiah chunga hnathawk lo ang maia a chhuah lui chu a bial chhung hre chiang lo hlea an ngaih thu Congress party-in an sawi.
Nimina an thuchhuahah Congress party chuan chief minister-in September, 2018-a Aizawl East II Block Conference-a ‘Aizawl khawpui hi traffic jam awm lohna state capital-ah a awm chhun a ni an tih turin kan siam dawn’ tia a sawi te, an sorkar a nih chuan Aizawl khawpui atanga Assam Rifles sawn chhuah a ni ang tia a sawi te a hre chiang bertute chu Aizawl East II mipuite an nih thu sawiin, “Tunah chuan Aizawl chu India state capital traffic jam nasatna ber a ni a. Assam Rifles pawh tun thlengin sawn chhuah an la ni lo bawk,” an ti.
Congress sorkar liam taah khan Finance Minister Lalsawta’n Aizawl East II huam chhunga mi ngei Bazarpui sak thatna tur sum a dahte chu vawiin thlengin MNF sorkarin a la sak puitlin theih loh thu an sawi a. Heti chunga Chief Minister Zoramthanga chu thiltithei leh taima tia Robert Romawia’n a sawi duh hi chief minister tihmualpho tumnaah Congress party chuan a ngai tih thuchhuahah an tar lang.
Congress party chuan an president thar, Lalsawta lakah Zoram mipuiten rinna an nghat mek thu an sawi a. “Amah anga ei rukna kawnga fihlim hi an tam lo hle tih hi a hretu chu Zoram mipuite an ni,” tiin, finance minister a nih laiin Mizoram sorkar leiba a tlakhniam thu te, a hun takah sorkar hnathawkten hlawh an lak thu te, Mizoram chu India ram state-ah GSDP leh Per Capita Income sang pawl tak a ni phak thu te leh health care bill a hun taka pek chhuah thin a nih bakah bill batsak an awm ve ngai loh dante thlir a, MNF nge Congress sorkarin finance minister nei tha zawk tih lo ngaihtuah nawn turin Robert Romawia hi Congress party hian an chah tih an tar lang bawk.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427