Aizawl: School Education Minister Lalchhandama Ralte chuan sorkar sikulah zirlai naupang an pun avang hian zirtirtute chu an hnaah theihtawp chhuaha missionary rilru pu turin zirtirtute a chah.
E. Phaileng, Kepran, Sunhluchhip leh N Serzawl te nimin khan School Education Minister Lalchhandama Ralte-in a tlawhnaah thu sawiin, kumina sikul bul tan chhoh mekah sorkar sikulah enrolment a pung a, classroom mamawh belh te, naupang thutna tur thutthleng leh dawhkan mamawh belh te, zirtirtu mamawh belh te kil hrang hrang atangin department-in a dawng tih a sawi a. “Mipuiin an rohlu ber an fate an dah hian sorkarah rinna an nghat tih a lantir a, a lawmawm hle a ni,” a ti a; zirtirtute chu an hnaah theihtawp chhuaha missionary rilru pu turin a chah.
Minister Lalchhandama Ralte hian khawvel lo awm zel tur hi education kutah a awm avangin zirtirtute an hnaah inpe zual a, naupangte nen inkawmngeiha, naupangte talent tipunga, hmantlaka chher tura chahin, “Khaw tina tlawmngai pawlte leh khawtlang hruaitute pawh zirna hmunhmate humhalha a theih ang anga neitu chan chang turin ka sawm a ni,” a ti.
Hmar tlangdung khaw hrang hrang a tlawh kualnaah hian khawtlang hruaitute leh mipuiten an lo dawngsawng a, khawtlang mamawh leh hmasawnna turte minister hnenah an lo thlen bawk.