Aizawl : Champhai Excise & Narcotics Dept (END) te’n hmun hnihah ruihhlo an man.
April 18, 2022 tlai dar 3 khan Champhai END-te chuan, Chhungte area ramhnuaiah zu siamna hmun luhchhuakin, heta zu chhuang lai Nangzathanga (53), Kanan Veng, Champhai leh a zu siam lai rakzu litre 12 bakah zu siamna hmanrua – bel pali, bel mawngpawp pahnih leh plastic container paruk bakah zu bilh lai tin 70 an man.
Hemi ni vek hian Zokhawthar road, Vawmkawlui bulah zan dar 9:30 khan heroin ni ngei a hriat gram 54.06 (hawng 4) leh a kawltu ni a puh Lalrindiki (20), Vanapa Section, Zokhawthar chu man a ni a. He heroin pawh hi Champhai a dehral tur ni ngei a hriat a ni.
He’ng an mi man te hi MLP Act leh ND & PS Act hnuaiah thubuai siamsak an ni a, nimin khan Court-ah thawn nghal an ni.