Tun hnaia Pangbalkawn leh Bairabi vela thlipui leh rialin chenna in a tihchhiat tuartute chu Mizoram Synod-in chhawmdawlna a hlan.
Chhawmdawlna pe tur hian Mizoram Synod puipate an kal a, Pangbalkawn Bialah chhungkaw 140 leh Bairabi Bialah chhungkaw 41, an vaiin chhungkaw 181 chhawmdawlna atan hian Rs. 14,68,000 chu Bial vawngtu Pastor-te leh an Bial hruaitute kutah an hlan a ni.
Thlipui leh rial avang hian chenna in chhe vek leh thawmthat ngai chhungkaw 181 lai an awm a, Pangbalkawn leh Pangbalkawn Hmar Veng huam chhunga chhungkaw 75 tan Rs 5,48,000 , Meidum, Meidum Vengthar, South Chhimluang leh Bethlehem Branch Church huam chhunga chhungkaw 65 te tan Rs 4,48,000 hlan an ni.
Bairabi Hmar Veng huam chhunga chhungkaw 16 tan Rs 1,38,000 leh Bairabi Chhim Veng huam chhunga chhungkaw 25-te tan Rs 3,34,000 chhawmdawlna hlan an ni bawk.