Aizawl : MNF Treasurer K Vanlalauva chuan mite’n an hmuhsit loh nan hnam sipaite inpumkhat tlat a tul tih Ex-Mizo National Army Association (Ex-MNA) khawmpui vawi -11 neihah khuallian niin a sawi.
Dawrpui Multipurpose Hall-a nimina Ex-MNA khawmpuia khuallian K Vanlalauva hian thu sawiin, “Zalenna sualtute’n kan tlin loh vang leh kan peih tak loh vang ni loin; mipuite’n lei rem rap phawt ila, zalenna a mit lo ang. Mite’n Mizo hnam sipaite an hmuhsit loh nan inpumkhat tlat a tul,” a ti.
K Vanlalauva hian, “Kum 1966 atanga tun thlenga awmkhawm kan ni,” tiin, Peace Accord MNF Returnee leh Ex-MNA awm mah se, an tum a thuhmun a, an thian MURA-te pawh an la nung tek tek tih sawiin, “Keiniho hi i inpumkhat tlat ang u, kan inkarah eng agency mah awm suh se,” a ti a. Ramhnuaia an thil tawn tam takte hre renga inhmangaih tawn tlat turin hnam sipaite a sawm a ni.
MNF sorkar din Martar thlamual committee chu chawlhkar kalta mai khan an thutkhawm thu leh a hmun an tlawh thu a sawi a. Martar thlanmual chu 4.5 bigha vela zau niin, hall lian a sak theihna tur leh chei chhunzawm tur a nih thu a sawi bawk.
Ex-MNA General Assembly vawi 11-na ah hian rorel inkhawm neiin resolution an pass a, Mizo hnam tana martar-te leh member boralte sunna hun an hman bakah pawl hruaitu thar atan President-ah C. Zama, Vice President-ah Vanlalruata Ralte leh Treasurer atan Vanropuia Sailo an thlang a ni.
Ex MNA khawmpuiah hian hetiang hian resolution an pass:-
Covid 19 hriin hun rei tak min chenchilh a, vawk hri a leng a, ram kang kan tuar a, Refugee thahnem takin min chenchilh bawk a, chutiang karah chuan ei leh barah harsa lovin vawiin thlengin kan awm a, eirawngbawlna gas pawh kan hnianghnar a, harsatna hnuaiah pawh hruaitu rintlak Chief Minister Pu Zoramthanga kan nei hi lawmawm kan ti a, kan chhuang takzet a ni.
Aizawl khawpuia lirthei tawt tihziaawmna tura lei verhna tur pawisa Central Sawrkar a kar chhuak a, bul tan thei tura hmalak a ni thei ta hi lawmawm kan ti takzet a ni.
Kum 2018-a MLA General Election MNF Manifesto Political 4-na thu angin Hnam Sipaite leh Martar chhungte chhawmdawlna tur ruahmanna min siamsak turin MNF Sawrkar hi kan ngen a ni.
“Kum 2023-a MLA General Election awm turah kan Chief Minister Pu Zoramthanga kaihhruai hian hnehna a chanpui ngei kan ring a, a tihlawhtling turin rinawm takin a kan zui zel dawn.