Tourism Minister Robert Rom- awia Royte-in COVID19-in Tourism Industry a tihthuanawp chu a ziaawm chho leh tawh tih sawiin, “Mizoram Tourism deptt-in post covid strategy changtlung tak a buatsaih a, ram pawn leh India ram chhunga zin mi hipna tur ruahmanna hrang hrang a siam chho mek” a ti.
Planning & programme implementation department leh Tourism department-in Development of North Eastern Region Ministry leh North Eastern Council te nena tangtlanga -Untapped Eco-Tourism Potential- tih thupui sawihona nimina Aijal Club-a an buatsaihah he thu hi Tourism Minister chuan a sawi a. India zalen kum 75-na lawmna Azadi ka Amrit Mahotsav kal zelah hmarchhak state tinah North East Festival buatsaih niin, he sawihona hun pawh hi North East Festival neih mek peng pakhat a ni.
Tourism Minister chuan Tourism subject-in a huapzau hle tih sawiin, Mizoramin sports leh adventure tourism lamah hmabak eng tak a nei niin a sawi a. “Football-ah te, boxing-ah te leh hockey-ah te Mizo thalai ten India ram an al hneh hle a, heng mihlawhtlingte avang hian Mizoram pawhin hriat a hlawh a, Sports tourism hi Mizoram tan chuan tihtakzeta tuipui tham niin ka hmu a ni” a ti.
Adventure tourism lamah pawh kawng a inhawng zau zel nia sawiin, Robert Romawia chuan state dangte neih ve loh Motosports racing track, Lengpui Airport bulah siam tum a nih thu a sawi a. Rural Electrification corporation (REC) atangin a siamna tur sum Rs. vbc 7.5 hmuh a nih thu a sawi bawk.