European Union (EU) chuan a na thei ang bera Russia hrekna tur a chhawp thar mek a, hetah hian an tuialhthei laksak thin zawng zawng tihtawp leh Ukraine-a indona chhuak meka dan bawhchhia (war crime suspect)-te hrekna a tel.
European Commission President Ursula von der Leyen chuan an tum ber chu na zawka Russia nawr chunga Europe khawmualpui chhe tur hum a nih thu a sawi.
Russian tuialhthei thlitfim lohte chu a tahtawlin thla ruk lo awm leh tur chhunga an lak luh tihtawp tuma ruahmanna siam a nih thu a sawi.
Bucha leh Mariupol-a civil mi tam tak an thihnaa inrawlh sipai hotu liante pawh hrek thar an tum.
“Hei hian Kremlin-a indona duangtute tana hriattirna a ni a, tute nge in nih kan hria,” tiin von der Leyen hian European Parliament-ah Nilaini khan a sawi a ni.
EU hian chawlhkar eng emaw zat chhung chu Russian tuialhthei leh boruakalhtheia innghah loh dan tur hi a lo dap tawh a. Kum 2022 kumtawpah chuan boruakalhthei a chawk luh chu hmun thuma thena hmun hnia titlem turin a lo intiam tawh a, tuialhthei thlitfim loh pawh a tahtawlin, thla ruk chhunga a lak thin tihtawp leh thlitfim tawh pawh kum 2022 kumtawp ruala laksak tihtawp a tum leh ta bawk.
“Russian tuialhtheite hi a tahtawl zelin kan hlat hret hret dawn a ni,” tiin Commission president chuan a sawi.
Russia hrekna tura ruahmanna thar hi EU ambassador-ten an pawm phawt a, ni reilo te hnuah a tak taka kalpui tura peih a nih hmel.
Russian tuialhtheia innghat pumhlum, Slovakia leh Hungary ramte erawh kum khat hun pek bik niin hetih chhung hian ram dang atanga lak luh dan an dap dawn a. Hungarian Foreign Minister Peter Szijjarto chuan tuna ruahman ang hi chu Budapest-in a thlawp theih rih loh thu a sawi a, Slovakian economy minister pawhin insiam rem nan kum thum tal an ramin a mamawh thu a sawi ve bawk.
Nikum chhung khan EU-in hmun dang atanga tuialhthei a lak luh zawng zawng hmun lia thena hmun hnih kha Russia atanga an lak a ni a, Germany chu a leisak tam ber an ni.
Tunah erawh Germany hian a leisak thin nasa takin titlemin a hmaa ram dang atanga a lak luh thin zinga 35% zet tling chu tunah chuan 12% chauh a ni tawh a. EU-a tel ve tawh lo, UK pawhin a tahtawlin Russian tuialhthei hi a la lut tlem hret hret a, a lak luh zinga 8% chauh a ni tawh.
Czech Industry Minister Jozef Sikela chuan Commission-in ruahmanna an siamte chuan tlakchham hun a lo thlena EU ramten an insem dan tur a tel lo niin a sawi.
Kremlin thupuangtu, Dmitry Peskov chuan EU hrekna tur siam avang hian Moscow chuan an thil neih tihral dan tur an dap ve mek tih a sawi a. An ram hrek chu European leh mi dangte tawrhna mai a nih thu leh European-ten ni tin man to zawk zela an lei a ngaih tur thu a sawi.
Bank leh TV lam hawi leh
Russia-in Ukraine a rûn tirh khan EU hian an ram china tihchhuah thin network lian tak pahnih, RT leh Sputnik chu a titawp nghal a, heng network hi sap, German leh Spanish-a tihchhuah thin a ni a. Hrekna thar turah hian Russian sorkar enkawl broadcaster lian dang pathum, cable, satellite, smartphone leh online-a tihchhuahte chu tihtawp leh a tum.
“Heng TV channel-te hi Putin-a dawt leh an tih dan dik lo tak tak puanna a ni tih a chiang,” tiin von der Leyen-i chuan a sawi a. Network pathumte hi an hming a sawi lo va, Russian tawnga tihchhuah, en hlawh tak, Rossiya leh sorkar hnuaia operator, VGTRK-in an tihchhuah, RTR Planeta channel chu tel ngei tura rin a ni.
EU hian Russian company-ten accountant, dan hre mi leh spin-doctor kaltlanga Europe-a service an neihte pawh tihtawp a tum bawk tih von der Leyen-i hian a sawi.
A hmaa hrekna lo kalpui tawhte kha Russian bank-ten an tuar hle a; mahse, an bank lian ber, Sberbank chu Russian tuialhthei an leinaa an hman a nih avangin khawih a ni lo va. Sberbank hi Russia-a banking sector lama thil chevel hmun thuma thena hmun khat zet awmna niin tunah hian SWIFT global financial messaging system atanga paih tum a ni mek a. Russian bank dang pahnih pawh hrek tum an ni bawk.
Hrekna hmasaah khan Kremlin leh Ukraine an rûnnaa inhnamhnawih nia hriat mi mal pawh telh nual an ni tawh a. Tunah hian Russian Orthodox Church-a an hotu ber, Patriarch Kirill pawh a tel nia sawi a awm mek a, EU-in a hrek thar tur zingah Kremlin thupuangtu, Dmitry Peskov pawh telh thar a ni bawk.