Kum 2025-ah chuan India hmarchhakah cancer netna vei chu 13.5% laiin an tam tawh zawk dawn niin Indian Council of Medical Research (ICMR) hnuaia National Centre for Disease Informatics and Research (NCDIR)-in zir chianna a neihah tar lan a ni.
Zir chiangtuten an hmuhlawk dan chuan kum 2025-ah chuan hmarchhakah hian cancer natna nei mi 57,131 an awm tawh dawn a. Heng zinga mi 30,985 chu mipa niin hmeichhia 26,146 an awm bawk ang.
Zir chiannaa thil hmuhte hi Ningania World Cancer Day denchhena tihchhuah a ni a. An hmuhlawk dan chuan Assam chu dinhmun hlauhthawnawm ber an ni.
ICMR-in a zir chianna dangah chuan he state-ah hian mipa pali zela pakhat leh hmeichhia paruka pakhat zel chuan cancer natna vei thei dinhmunah an ding a, India ram puma a sanna ber niin Dr B Borooah Cancer Institute (BBCI) director, Dr Amal Chandra Kataki chuan World Cancer Day denchhenin a sawi.
“Mipa chawkawng cancer (4,351) leh hmeichhia hnute cance (4,126) chu kum 2025-ah chuan pung hle tura ngaih a ni,” tiin ICMR-NCDIR, Bengaluru-in North East Report 2021 a siamah tar lan a ni.
India hmarchhakah hian kum 2020-ah khan cancer natna vei mi 50,317 (mipa 27,503 leh hmeichhia 22,814) awm anga ngaih a ni a. Zir chiannaah chuan heng zinga mi 5,785 chu chawkawng cancer anga chhut niin a tam fal hle a. Kum 2025-ah phei chuan tam hle turin an ngai.
Hnute leh chuap cancer chu hmarchhaka cancer natna lar pahnih an ni bawk a. Nikum khan hnute cancer mi 3,674 leh chuap cancer 3,413 awm anga chhut a ni.