Cyclone-in India pan mek, Odisha-Andhra a nuai dawn em la hriat rih loh

Odisha-a Met department thuneitute chuan Andaman Sea chhim lam leh a bul, Bay of Bengal chhimchhaka Zirtawpni tuka low pressure area insiam chu Pathianni tlai hian Bay of Bengal khawchhak lam laili-ah cyclonic storm-ah insiamin hmarthlang panin a kal zel dawn tih an sawi.
Bhubaneswar-a Meteorological Centre Director HR Biswas chuan cyclonic storm hi hmarthlang pan zela a kal a beiseiawm thu leh Bay of Bengal khawthlang laili, Andhra-Odisha vaukam hmar lam chu May 10-ah a thleng dawn niin a sawi.
“May 10 pawh hian vaukam atanga km 200 velah a la awm dawn a, a hnu lama a kal zel dawn tur hi sawi lawk a la har a. A nat dan tur leh Odisha a thleng dawn em tih la chhut lawk theih a ni lo,” a ti.
Biswas chuan tun dinhmunah chuan Andaman Sea, Andaman Islands leh Bay of Bengal-ah May 8 thleng hian tuipuiah darkar khata km 75-a chak thli a tleh theih avangin sangha mantute hnenah chauh warning la pek a nih thu a sawi.
Odisha vaukam hi cyclone-in a nuai dawn em tin sawi lawk theih a nih loh thu Special Relief Commissioner Pradeep Jena chuan a sawi a, sorkar erawh a inbuatsaih tih a sawi.
“NDRF team 17, ODRAF team 20 leh kangthelhtu team 175 kan kawl sa a. Odisha a lo pan a nih chuan lo hmachhawn turin sorkar a inpeih,” a ti.
Jena chuan tun hnaiah Odisha-in nipuia cyclone vawi thum a tawrh thin tak avangin cyclonic storm dang lo thleng avangin an chiai lo tih a sawi a. “District 18-a collector-te chu cyclone-in a thlen theih thil laka inring tura hriattirna ka pe tawh a. Collector-te pawhin an tana tul ang zelin hma an la a ni,” a ti.
Jena chuan district emergency office leh control room zawng zawng pawh nileng zankhuaa inring tura tih an ni tih a sawi a. “Collector-te chu dinhmun derthawnga awmte dap chhuaka hmun hima insawn ngai pawimawh hmasa turin tih an ni a. Building himte zawng tura tih an ni a. Hmun him, mi dah khawmna tinah hian thuneitu pathum (mipa pahnih leh hmeichhia pakhat) zel dah an ni a. Hmun derthawng laia pucca school buildings/public building himte chu mi seng khawm nan hman tum a ni,” a ti bawk.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427