Mexican chanchinbumi, Luis Enrique Ramirez Ramos chu thah a ni a, kumin chhunga an rama chanchinbumi thah pakuana a ni ta a, chanchinbu lama thawk thah an pung zel tih lanna a ni.
Ramirez Ramos-a ruang hi Sinaloa state khawpuia hnawm chhekna bul kawngpui khawro takah plastic-a tuamin Ningani khan chhar a ni a. Prosecutor-te chuan a lua vawi tam tak kutthlakna avanga thi niin an sawi.
“Tualthahna a ni chiang lutuk,” tiin chanchinbumi dikna chanvo humhalhtu pawl, Reporters Without Borders aiawh, Balbina Flores chuan AFP news agency a hrilh.
An pawl hian Ramirez hi kumina Mexico-a chanchinbumi thah pakuana niin an sawi a, indona pawn lamah chuan he ram hi chanchinbua thawkte tana hmun hlauhawm ber a ni tih an sawi.
Thah a nih chhan hi hriat a la ni lo va; mahse, Sinaloa state hi ruihhlo tawlhruknaa a bultumtu lian tak, Joaquin ‘El Chapo’ Guzman-a Sinaloa cartel tamna a ni.
Mexico ram hmun hrang hrangah hian chanchinbumite hian ruihhlo tawlhtute chungchang leh politician leh police-te inkungkaihna an an chhuah thin avangin bitum an hlawh thin hle a ni.