- Mahmuaka Chhakchhuak
Leilunga mihring piang tawh zingah chuan hming ngah bera chhal ngam tur leh a hming pakhat ringawt pawh sawifiah ngai lehnghal neitu hi tunge a nih tih chu inhrilh hranpa kan ngai kher awm lo e. A ni chu a pian hma kum 500 vel lai atang tawha buaipui leh hrilhhlawk niin nau puakpuan tur lo tah lawk tawh a ni nghe nghe a. A lo pian dawn hnaihah phei chuan khawvel mite an buai a, khawvel mite chauh niloin khawvel sorkar an buai a nih hial kha. A lo pian chhuah hlimah lah chuan khawchhak lama mifingte chuan vansang taka Arsi eng atangin lei leh vana lal ber rawn piang tih an hria a, Arsi chuan hruaiin Judai ramah a hruai a nih kha. Heng mifingte hi tute nge an nih tih chu chiang taka hriattheih ni kher lo mahsela mithiamte chuan Aigupta leh Greek ram atanga rawn kal niin an sawi a, an hming pawh Casper, Melkior leh Balthasar niin an sawi. Nimahsela Bible pawn lam erawh a ni a, chiang taka an chanchin kan hriat theih chin erawh khawchhak lam atanga rawn kal an ni tih leh Arsi lam chanchin zir mi an ni tih chu a ni mai.
Lal rawn piang tur chibai buk tuma rawn kal ta chuan lal Heroda Inah an lut ta pawh chu thil awm tak a ni a, nimahsela Jerusalem atang chuan Bethlehem lamah kal lehin Inchhunga nausen pawm lai Mari chu an va hmu ta a, bawkkhupa chibai buk pah chuan an robawm hawngin nausen hnenah chuan lawmna rangkachak te, beraw te leh murra te chu an hlan ta a. Chung thilte an hlan zawh chuan an khaw lamah an haw leh ta nghal mai a. Helaia thilmak tak mai chu zan an riah thu kan hmu loin an chawlh khawmuan thu engmah kan hmu lo hi a ni. Chutih lai chuan Judai ram awptu lal Heroda ngei pawh chu alo buaiin chutih hunlaia nausen piang zawng zawng chu thah chiih vek alo tum a, Jesepha leh Mari pawh chuan an nausen pianghlim chu Aigupta ram lamah an tlanbopui ta nghal a. Nausen pianghlim leh a nu, nau hring zo hlim khualkhaw hla taka an tlanbopui chu a rapthlak ngawt ang le.
Heroda boral hnuah chuan Judai ramah kir lehin Galili ram lam Nazareth khuaah chuan awmhmun bengbelin hun an hmang ta zawk a. Nazareth khuaah hian engtin tak nge hun an hman thin tih chu hriat a ni ta lo vang vang a, kan hriat leh hmasak ber chu kum 12 a niha Kalhlen Kut hmanga Jerusalema an kal thu leh a nu leh pate hriat loha Biakbuka zirtirtute zinga thu ngaithlaa alo awm thu chu a ni. Kum sawm leh kum hnih mi chauh a ni nain a nu leh pate zawn ngai khawpin Biak bukah hun a hmang a, an va hmuh lah chuan ‘engatinge min zawn, ka pa ina ka awm tur hi in hre lo em ni?’ alo ti zawk mah leh ta nghal a. Naupang danglam leh mak tak zawng a ni ngei e.
Rawngbawlna a neihna hmun reng rengah pawh tawngkam a tui tam duah ngai lo a, a sawi tur chin chiah sawiin sawi hreh pawh a nei hek lo. Tumah hmaizah pawh a nei hek lo a, amah zawngtute lakah pawh a biru ngai hek lo. Chuti chung chuan ngilneihnaa khat a ni a, khawngaihna leh hmangaihna neiin nitin rawngbawlna a nei reng a, i biang vei lama bengtu che hnenah chuan i biang ding lam pawh dawh leh rawh ti khawpin midang a zirtir thin. Chumai bakah midang hriatthiam mai theih loh turin thusawi ala ching fo bawk a; A zirtirte ngei ngei pawhin ‘Zirtirtu, engkim kalsanin kan zui che a, enge lawmman kan hmuh ve tur ni ang le’ an tih chuan a ni chuan ‘Siamthar lehnaah chuan Mihring Fapa hi a ropuina thutphaha a thut hunah, nangni mi zuituteho hi Isreal hnam sawm leh hnam hnihte chu ngaihtuahin lalthutphah sawm leh pahnihah in la thu ve ang’ tiin a chhang a, thlarau lam mitvarna nei lo tan chuan hriatthiam ngaihna reng a awm mawlh lo.
A hming reng reng hi a makin hriatthiam a harin a pian hmaa zawlneiin a hming min hrilhte chu – Maka, Remruattua, Pathian Chaka, Chatuan Pa, Remna Lal tihte a ni. A mizia pawh a mak narawh e; Dan lam a zir kan hre hauh lo nain Mosia dan leh dan dangte chu a hre em em a, damdawi lam thiamna pawh zir si loin doctor te doctor a ni bawk a. Sualna nei si loin misualte thian a ni a, pianhmang thatna leh hmelmawina reng reng nei lo anga zawlneiin min hrilh a ni nain a hmelah damna a awm avangin mi tam takin an zui reng bawk si. A nu leh pa atanga sum leh pai an neih hriat ni hauh siloin midang tan nitin hun an hmang thei tlat tho a, hmangaihna leh khawngaihnaa khat ni mahsela a thusawia dingnghet tlat mi a ni. Inngaitlawm em em chung siin midang aiin a inngaihniam chuang hauh lo a, indo lentir tura khawvela rawn kal nimahsela Remna lal tih a ni bawk si. Kalvari tlangah khenbeh a ni a, khenbeh a nih ni phei chuan khawvel tihthimin a awm hial a nih kha. A thi a, chatuana nung reng turin thihna hnehin a lo tho leh a.
Chutiang mihring chu a nih vang nge ni a chanchin ziakna lehkhabu hi lehkhabu dang zawng aiin a tam a, chuti chung chuang a chanchin chhui tur leh a seilen dan chhuina erawh fiah taka ziakna a awm chuang si lo. A hmel lah chu riruatna hmanga ziak chauh kan hmuh theih a niin chu chu King James hunlaia mithiam kalkhawmin an riruatna hmanga an ziak nia sawi a ni. Vawiin thlenga la thlak danglam a ni chuang lo te hlei hlei hi a mak a, nimahsela chu thlalak chu anga tar atan chauh emaw kan duh tih turin kan tahpui ber zawk chu a rawngbawlna zawk chu a ni si. Kalvari tlanga a thihna aiin a tawrh tur zawng zawng hre sa veka Bethlehema alo pianna hi tahpui tur zawk tak a ni nain chulam chu kan lawmpui zawkin hlimna ni atan kan hmang hlauh a. Khawvelah kum 33 vel hring a chan chhungin vawi khat chiah chawimawiin a awm a, vawikhat chiah lawmna hun a hmang a nih chu. Chuti chung chuan amah tihmualpho tumtute chuan an veh reng a, a tawpah phei chuan hekna avangin manin a awm ta hial a nih kha. A hektu ber lah chuan inchhirin ala inawkhlum leh zel a.
Khawvelah kum thum vel chauh rawngbawlna a nei hman nain a rawngbawlna chanchin chu vawiin thlenga la sawi a niin kan sakhaw puithiamte chuan sawi tui berah an la nei a, kum sang tam tak liam taka a thilmak tihte pawh chu vawiin thlenga mak tih ala niin khawvel hian a ngaihna reng hre mawlh lo. Heti khawpa a mimal chanchin sawi a ni chung hian a chanchin chhe lam sawi tur reng reng hria an awm lo hi thilmak ni si lo ah chuan a mak ber hial awm e. Hmangaihna leh khawngaihna a ngah thu kan hriat ang huin hmangaihna leh khawngaihna avanga a hmingchhiat phahna sawi tur hria kan awm chuang reng reng lo a, a hming pui, a hming ang pu mi an tam tawh reng nen hian amah chauh chu Pathian Fapa tih ala ni lehnghal a. He Nazareth Tlangval hi kan sual zawng zawng man atana mahni inpe a niin, hnawmtinphurinu angah a rawn chang a, a tawrh tur zawng zawng hre chunga khawvela mihring anga rawn pianga chu a nih bawk avangin nang leh kei hian mathei loa amah kan fak a, kan chawimawi hi tihmakmawha kan neih hmasak ber tur chu a ni.
A hnung zui turin min sawm reng tak nain kan duh lo chung chung chu chuti takin min sawm chuang hauh lo a, duhthlanna fel tak kan neih theihna atan rei tak chhung min nghak peih thung si a. Mi tam tak chu a hmangaihna thu min hrilh a, kan hriat fiah mai laiin thenkhatte erawh a hmangaihna an hriatfiah a, an hmuhfiah theihna turin hrehawm a tawrh hmasak tir ang lawi bawk a, chuti chunga la hmufiah duh lote chu nikin ni rorelna huna rel fel atan a khek mai zawk thin. Hmangaihna a ngah avanga zuam ngawt chi lah chu a ni hauh lo a, mi kanral hmang mi a ni nain dawhtheihna a ngah viau bawk si. Mi ngainatawm tak a nih rualin a zahawm bawk a, amah hrechiangtu leh hnaihtu apiangte hian a thu an awihin a mit tlungloa awm hi an duh ngai lo a ni. Engkim hretu leh engkim neitu a nih avangin a hrechiangtu apiangte chuan mittui nen amah fakna hla an la sa reng bawk thin.