Aizawl: Mizoram Legislative Assembly Golden Jubilee lawmna kal mekah nimin khan seminar buatsaih a ni a. Chief Minister Zoramthanga chu khuallian niin a hmanpui a, jubilee chu hmasawn zual zel tumna hun nise a duh tih a sawi.
Assembly House Annexe Conference Hall-a seminar buatsaihah chief minister chuan thu sawiin golden jubilee puala seminar hlawkthlak tak mai buatsaih a ni a, legislator lo ni tawh leh ni mek thahnem tak an kalkhawm thei chu lawmawm a tih thu a sawi.
Chief minister hian kum 50 chhunga Legislative Assembly kalphungah hmasawnna nasa tak a awm chu lawmawm a tih thu te, felfai taka rorelna kalpui a ni thin te, house rorelna chhunga ri buai buai thil tha chhuak chuang si lo hmuh tur a awm lo te chu entawntlak a tih thu leh tun dinhmun hi duhtawk mai tur erawh a nih loh thu a sawi bawk.
“Jubilee dang pawh Mizoram Legislative Assembly chuan a la hmu leh zel turah beisei chungin house activity-ah hmasawn zelin, hmasawn zelna tur leh zir belh zel tur a awm tih hriain, Zoram tan ro tha hnutchhiah theih nan golden jubilee hi hmasawn zual zel tumna hun lo ni se,” a ti.
Seminar hi Speaker Lalrinliana Sailo-in a kaihruai a, Dr. Kenneth Chawngliana, Ex-Speaker-in ‘Ram hmasawnna tluantling nei tura Legislature-te pawimawhna’ tih paper a present leh H. Lalrinawma, Commissioner & Secretary, Mizoram Legislative Assembly-in ‘Legislature leh Executive inlaichinna’ tih paper a present te chu zir ho a ni.
He seminar-ah hian MLA te, Former Legislators Association of Mizoram (FLAM) member-te leh sorkara hotu pawimawh te an tel a ni.
Mizoram Legislative Assembly kum 50 tlin pual hian kumin March thla khan TV-ah Talk-Show lo buatsaih tawh niin, April thla khan discussion programme-te, Youth Parliament competition bakah Golden Jubilee Exhibition buatsaih a lo ni tawh bawk.
Nizan khan Larsap Dr. Hari Babu Kambhampati hoin cultural programme neih a ni a. Vawiin hian Assembly Special Session neih a ni ang.