Armed Forces Medical Services (AFMS) chuan medical doctor chawl tawh mi 400 chu ramin Covid-19 hripui a do meknaa thawk turin thla 11 chhung a ruai leh dawn.
Defence ministry chuan Inrinni khan AFMS-in kum 2017 leh 2019 inkara sipai doctor chawlte koh kir a tumna hi phalsakin nimin khan puan a ni.
Defence ministry-in thuchhuah a siamah chuan, “Thla khat atan an lawmman tur bi tuksak an ni a, an lawmman tur hi an pension laia lawmman an lak atanga chhutsak an ni a, hlawh hran bik siamsak an ni bawk ang. Contract chungchang leh allowance dang chu pek an ni lo vang,” an ti.
Sipaite hi India-in Covid-19 thawh hnihna a tawrh mekah a hmatawngah an tang tan thuai dawn a. India pumah damdawi in, thawktu leh oxygen indaih lohna a nasa em em a. Sipai tanglaite bakah chawl tawhte pawh a tul ang zela koh kir tum a ni.
Damdawi thiam an thawh bakah hian sipaute hian a hma pawhin hri leng beihnaah tha tam tak an lo thawh tawh.
Ramin a mamawh oxygen sem darh kawngah te, Covid-19 damdawi in siam leh civil mite tana sipai damdawi in hawn te, damlo na zualte phurh sawn lamah pawh an tangkai hle.