EDITORIAL 10/5/22

MADC inthlan result hian nakkum a hril ruak ang em?

Mara Autonomous District Council (MADC) inthlan result chu nimin khan chhiar niin, ralmuang taka chhiar zawh a ni ta a, BJP in dinhmun duhawm tak changin, a lan dan maiah chuan sorkar na an siam ngei a rinawm bawk.
State-ah MNF sorkar mah se, district council lamah erawh chuan eng ruai an ni theiin a lang lo a, an dinhmun hi an inchhui zui a, an inenlet ve deuh a ngai viauin a rinawm. An sahuai tak tak serin, an mi langsar tak tak campaign mah se, Mara lam unauteah an tla na tawk lo hle tih a hriat a, nakkum MLA thlan a nghawng tel lovang tih sawi thiam a har hle bawk.
Kan hriat angin MADC inthlanpuiah hian party hrang hrangten sorkarna siam ngei tumin campaign pawh an beih ngawrh hle kha a ni a, campaign theih hun chhung khan party headquarter hruaitu thahnem takin MADC huam chhung hi an chamchilh a, BJP party campaign puiin union minister-te pawhin Siaha an cham chilh a. Vote thlak ni khan party hrang hrang hruaituten sorkarna an chan ngei an beisei thu chanchinbumite an hrilh hlawm a nih kha.
Tunah result kan hre ta a, beisei loh deuh deuh an tling ngeiin a rinawm a, beisei miah loh tling an awm ta nual ngeiin a rinawm bawk. Central-a sorkar BJP thawm a lian thawkhat hle a, INC lamah pawh president thar hnuaiah an rawn phur chho hle niin a lang bawk. State-a sorkar na chelh mektute mawlh hi an inenlet chhoh fe a ngai berin a rinawm a, engtin chiah nge nakkumah hian hma thar la a, vung an rawn chhuah leh ang tih hriat a chakawm hle tawh bawk.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427