Irish rock band U2 zaipu leh bandmate te chuan Ukraine khawpui Kyiv-a lei hnuai rel station-ah minute 40 chhung concert neiin, Ukraine mipuite zalenna suala an chetchhuahna hriatpuiin, a hmuna lawmpuina an hlan.
“In president (Volodymyr Zalensky) hian khawvela zalenna atana hmahruaitu a nihna hi tunah hian a lantir mek zel a, Ukraine mipuite hian an zalenna atan chauha bei an ni lova, zalenna ngaihlu zawng zawngte tan an bei a ni zawk,” tiin Khreschatyk metro station-a pungkhawm mipui hmaah a sawi.
Russia hian February 24 khan Ukraine a run a, beisei leh tum anga chet a harsat hnu ah March khan an khawpui Kyiv leh a chhevel atanga inlachhuakin, Ukraine hmar lama a bitum mek.
President Zalensky chuan video katlangin, “Bono leh a thiante chungah ka lawm a, kan mipuite an thlawpnaah te, kan mipuite tanpui an mamawh kawngah an inlanchhuah vang hian an chungah lawm-thu ka sawi a ni,” a ti.
Russia chuan Ukraine rama a chet dan hi ‘special military operation’ hming a puttir a, Ukraine ram hmun hrang hrangah missile sur tir mek a ni.
Kyiv khawpui hi nunphung pangngaiah a kir leh mak rualin, a khat tawkin siren a ri reng thin.