Mizoram leh Assam inrina, Vairengte lama Mizo huan/ram neituten him tak leh buaina tawk lova Assam police duty post an paltlang theih nan Farmer Identity card siamsak an ni dawn a; hei hi Mizoram sorkar hnuaia siam tur a ni.
Vairengte atanga thudawn danin, Mizoram leh Assam inrina, Assam police duty post kaltlang ngai Mizo huan/ram neiten buaina leh harsatna an tawh loh nan Farmer ID hi SDO(C) Vairengte-in a siamsak dawn a, hemi atan hian Vairengte-a Zau hruaitute chuan lo neitute hming list an lakkhawm mek a ni.
Assam police-in Mizo huan/ram neitute ID siamsak a tum nia thuthang chu a dik lo tih Vairengte police hotute chuan an sawi a, SDO(C) Vairengte-in ID a siamsak hi Assam police pawhin an lo hriatpui ve a, a tul anga an sahimnate an lo pek theihna turin list pek tum zawk a nih thu an sawi.
Kar kalta lam khan Assam police-ten Vairengte daiah kawng laih an tum tih hriat a nih avangin Vairengte SDO(C) Thianlala leh SDPO H Lunghnema hovin a hmunah enfiah nghal a ni.
Assam police lam hian an camp saa awm ngheh an tum chu Mizoramin a phalsak dawn lo tih an hrilh a; Assam lam chuan an camp bul hnaia Mizo lo kalte chu huan neitu an nih leh nih loh an hriat thin loh avangin an lo hau thin tih an sawi a, huan neitu an nih ngei chuan harsatna a awm loh thu an lo hrilh ve bawk.