Indian nupain court-ah tu neihsak duh lo an fapa khing

India hmar lam, Uttarakhand-a nupa chuan an fapain kum ruk zet nupui a neih tawh hnuah pawh an nupaa an tu tur fa an hrinsak duh loh avangin an rilru lama tha lo zawnga nghawng a neih avangin zangnadawmna pe turin an khing.
Kum 61 mi, Sanjeev-a leh a nupui kum 57 mi, Sadhana Prasad hian an fapa enkawl seilena thlawhna khalhtu ni tura a training-na leh nupui a neih lawm nan an pawisa neih zawng zawng an seng niin an insawi.
An inseng nasa em em chunga tu an neihsak duh loh avang hian zangnadawmna $ 6,50,000 dawn pe turin court-ah an zualko ta a ni.
An fapa leh an mo chuan he mi chungchangah hian engmah an la sawi lo va. Thil thleng ngai mang lo, rilru lama inhliamna thubuai thehluh a ni mek.
Prasad-a chuan a pawisa neih ang ang chu a fapa tan tiin kum 2006-a United States-a thlawhna khalh a zirna senso turin $65,000 a thawn vek tih a sawi.
An fapa hi kum 2007 khan India-ah lo kirin a hna a chân zui a, an fapa hi kum hnih chuang zet nasa takin an pui zui leh bawk niin Times of India chanchinbu chuan a tar lang.
Kum 35 mi, Shrey Sagar-a hian thlawhna khalh hna a hmu leh a. Kum 2016 khan nupui atan Shubhangi Sinha, tuna kum 31 mi ni mek chu neihsak lehin upa nia hna an thawh theih loh hun atana an nun tihlim tura tu an neih ngei pawh an beisei.
Mo lawm nan hian five-star hotel, $80,000 man car leh ram pawna honeymoon an hmanna tur an ngaihtuahsak leh vek bawk.
“Ka fapa hian kum ruk zet nupui a nei ta a; mahse, fa neih lam reng an la ngaihsak lo,” tiin Prasad chuan a sawi a. “Tute nen inawmin awmho ila chu kan hrehawmnate hi a reh ngei ang,” a ti.
An dan hre mi, AK Srivastava chuan an nupa hian an fapate nupuain rilru hrehawm taka an awmtir avangin zangnadawmna an phut ta niin The National chanchinbu hnenah a sawi.
“Nu leh pa zawng zawngin tu neih hi an nghahhlelh a ni a, kum tam tak chhung pi leh pu ni turin an lo nghak thlawn tawh a ni,” a ti.
Prasad-a te nupa hian Haridwar-ah petition an thehluh a, May 17-ah court-in a ngaihtuah ang.

Leave a Reply

Your email address will not be published. Required fields are marked *

error: Content is protected !!