Larsapin an hmalaknate sawipuiin minister leh tourism hotute kawm

Aizawl: Mizoram Larsap Dr Hari Babu Kambhampati chuan nimin khan Tourism Minister Robert Romawia Royte leh tourism official-te a kawmin tourism hmalaknate a sawipui.
Raj Bhavan-a an inkawmnaah hian Larsap Kambhampati chuan tourism department hmalakna chu a phurpui thu leh hna tha taka ram tana an thawk nia a hriat thu a sawi a. Tourism department-in project hrang hrang a kalpui mekte leh sorkar laipuia project a theh luhte bakah hma thar lak an tumna te chu hriat chian a duh thu te a sawi a. Mizorama Toursim sector tihhmasawn nan leh he sector-ah sum tam tak lakluh theih a nih bakah eizawnna mi tam tak tan a siam theih dan turte chu G. Kishan Reddy, Union Minister of Tourism leh Ganji Kamala Vardhana Rao, Director General (Tourism) te a sawipui tawh thu a sawi.
Larsap hian state chhunga tourist site-te awlsam zawka Lengpui Airport atanga tlawhpawh a nih theih nan UDAN scheme hnuaiah helicopter service a dil theih thu sawiin he thilah hian tourism department pawh hma la se, khualzin tan awlsamna an siam ngeiin a rin thu a sawi bawk.
Virender Jakhar, Executive Director, NHIDCL, Regional Office, Aizawl leh a thawpui te’n chuan Larsap leh Tourism department puipate inkawmna zawm ve leh in, he hunah hian Ministry of Tourism, Government of India in Mizoram chhunga NHIDCL te hnathawh tur a pek te an sawi ho leh a ni a. Larsap chuan, Tourism Department leh NHIDCL te chu inpawh takin thawkho thei se a duh tih a sawi.
Inkawmnaah hian Tourism Minister Robert Romawia Royte pawhin Larsap leh NHIDCL hotute hmaa Tourism department dinhmun a sawi hnuah, sorkar laipuia project theh luh te nawr zui ngaite Larsap hnenah kimchang zawk report an theh luh tur thu leh Larsap chu lo nawrpui tura an duh thu te a sawi a. NITI Aayog in project reng reng an enfiah zel tak avanga khawmuang ta deuh a awm thin thu pawh a sawi lang bawk.
He huna V Lalengmawia, Joint Secretary/CEO Mizoram State Toursim Authority in a tar lan danin, Mizoram Tourism Department enkawl thin khualzin thlenna leh hmunhma 96 zinga 27 chu mi mal sumdawngte enkawl tir an ni tawh a. Tun hmaa Mizoram Toursim department hnuaia awm ngai lo hotel, restaurant, tour operator, homestay, travel agent, fair leh festival te chu tourism department thuneihna hnuaiah dah a nih tawh thu a ni.
Kut pui hrang hrang – Zo Kutpui, Peace Pays Festival, Anthurium Festival, Winter Festival leh a dangte huaihawt a ni a. Tunah hian tour guide 89 hnenah certificate pek ni tawhin, social media kaltlangin theihtawpin Mizoram Tourism chu vawrh lar mek a nih thu tar lan a ni bawk.

Leave a Reply

Your email address will not be published. Required fields are marked *

error: Content is protected !!