MYC leh Vision IAS ten inremna siam

Aizawl: Mizoram Youth Commission (MYC) leh Vision IAS, New Delhi te chu Super IAS 40 programme hnuaia MYC in New Delhi-a Mizo thalai full sponsorship-a a tirh tur chungchangah a thuphungin an inrem.
Nimin khan Dr. Vanlaltanpuia, Chairman, MYC leh New Delhi atanga Vision IAS aiawh lo kal, Deepali Dutt Chaturvedi, Management Head leh Utkarsh Chaturvedi, Marketing Team Head & Regional Centre Co-ordinator te chuan MYC Conference Hall-ah inremna an ziak a ni.
MYC chairman chuan Mizo thalaite tan New Delhi-a IAS coaching centre tha ber ber zingah Vision IAS pawh a tha berte zinga mi a nih thu a sawi a. Mizo thalaite tana hmun siamsak tur leh an awmna turte pawh lo ngaihtuahsak a, lo enkawl turin a duh thu a sawi.
Vision IAS aiawha lokalte pawhin Mizo thalaite chu seat an lo pek bakah an awmna tur hmun thlengin ruahmanna siam dan tur kawng an zawn tur thu an sawi ve bawk.
MYC-in thalai 40 a tirh turte hi coaching centre pakhatah dahkhawm vek loin sem darh a tum a, Vision IAS bakah hian coaching centre tha dangte pawh koh mek an ni a, ruahmanna siampui zel tum an ni.
Nimin vek khan MYC Chairman hoin Vision IAS aiawh lo kal te chuan an hmalakna te sawipuiin Chief Minister Zoramthanga chu a pisaah an kawm a. Super IAS 40 programme hnuaia New Delhi-a Mizo thalai full sponsorship-a a tirh tur leh thawhhona chungchang sawihona an neih dan te chu hrilhin an sawipui a ni.

Leave a Reply

Your email address will not be published. Required fields are marked *

error: Content is protected !!