NIZAN TAWNMANG MAWL

  • Dr. Keihawla Sailo

“Mumang ni na na chu, tu huatthu mah va ni suh,” tiin he ‘Tawnmang Mawl’ hi kan tlangzarh ve leh phawng mai dawn zawng a nih hi aw. ‘Tak tak nge dawt,’ tih chu Chunglamami chauh lo chuan an hriat loh hmel khawp mai.

“Doctor,” tih hi keima invuahchawp pawh ni bik ta hek lo le, chanchinbuah meuh pawh kan thai lang ve thei ta kauh mai hi chu, Chunglama mi hnenah lawmthu ka sawi pawh lo ni nghal mai fahmiang; a tak taka ka chan ve theihna hi chu UNO atangin zu ni ve mauh maia maw le! Min petute hian dawt an sawi a nih pawh hi keimah ngei pawh hian ka la ring thei deuh dawn dawn asin maw le! Hemi chungchang kher kher erawh hi chu mumang mai zawng a ni miah bik si lo zawng zu nia!

Kha leh chen kha ka hming, Dr. Challiana, Engineer Dunglena pa phuah hi zahpuiin, “K.Hawla Sailo,” ka lo inti fo mai thin kha, ka pa thlarau hnenah tak, theih ni se ngaihdam ka dil nghal pawh lo ni ta mai se. Nungchate Paradis-a kan Thlam bangah ngei pawh, Doctorate Degree ka chan ve hma lawk atang pawh khan ka lo tial ve tawh asin. Ka naupan laiin, ka pianna, Hmar Mualcheng khuaa mite chuan, “Keia,” tiin min ko thin a. Ka chhang chiah hi, ‘Keithangi’ a ni a, ani pawh chu, “Keii” an ti thin a, kan duh lo ve ve thei hle thin a. Ka nau phei chuan, “’Keii,’ tih ai chuan, ‘Pawihi’ tih pawh ka duh zawk,” a ti ve khum mai thin zu nia maw le!

Mumang lam sawi lovin, thuhma I han zauh leh zel rih law law teh phawt ang hmiang mawle. Mite’n, “Eng tin nge kum 80 pelh hnuin, Doctorate Degree te i lo lak theih tak tlat mai chu ni le?” tiin biakhlatna ka dawng ve sup sup mai a. Keimah tak pawhin mak ka ti eltiang reng a, mumang ni te hian ka la ring thei dawn dawn lehnghal zu nia. Mumang chu a ni bik si lo. Mi pakhatin, a hming chu pho lang lo turin min tih avangin sawi lang lo mai ila, “I chanchin, tawitein (‘Bio-data’ a tihna) han ziak la, UNO lamah ka lo thawn sak ang chia, ‘Doctorate Degree’ i hmuh theih phah ngei ka beisei,” tiin biakhlatnain min rawn hrilh a. “Inbumna a ni em lovang chu maw,” tiin ka chanchin tawi chu ka va hrilh ta nge nge a.

Thla thum vel ral hnuin Delhi-a Constitution Club-a Seminar an neih chu kumin Zirtawpni Tha hnua Lal Isua Thawhlehna ni tlai dar 6-a tel ve tura sawmna chu ka dawng ve ta khiah mai a. Mumang pawh ang hlein ka hre thei hial a. “Tila ril tlak vanga zai hlim hlawt mai ka ni a, ka lo kal thei dawn si lova, kan nau K.Vanlalvena, Rajya Sabha M.P. hi ka aiawh turin in lo pawm thei ang em?” ka zu ti a. Anni chuan, “I lo kal kher pawh a ngai lo ve. Ni 10 emaw 15 vel chhungin i Doctor nihna lehkha (Certificate) chu kan rawn thawn mai ang,” an rawn ti ta mai a. Mumang pawh ang hlein ka hre rum rum a. India Sawrkar pawmpuinaa UNO World Peace Institute-in Doctorate Degree min pekna lehkha (Certificate) chu a lo ni reng mai a. Mumang pawh ang thei hlein ka hre rum rum a. He thil lawmawm tak ka dawn theihna tur atana hma min laksaktu, a mi hman kal tlangin Lalpa hnenah lawmthu ka sawi mawlh mawlh a ni. Inbumna chu a ni em lo vang chu maw. Ka chanchin ka ziak zawng zawng zingah khan, Nungchate Paradis chanchin ka ziak kha ka Mark min hmuhsantirtu ber niin a rinawm hlel lo. Dik dikin, Nungchate Paradis-ah hian thing 1000 vel lai, par zu nei chi leh rah chi hlir kan phun a. A phuntute chu, Minister te, I.A.S.te, M.C.S. te, Pastor te, Doctor te, Engineer te, mi challang leh langsar tak tak te bakah sawrkar hnathawk leh Driver te zu ni nawk hlawma maw le! Chung zingah chuan naupang te te te pawh an tel nawk nghe nghe hlawm a.Thlana lungphun ang maiin an thing phunah chuan an hmingte kan tar vek a, an damlai lungphun ang tehchawk pawh zu nia maw le.

May ni 9 zanah khan mumang tak tak chu ka nei a. Chu ka mumangah chuan khuallian chanvo ka lo chang ve mauh mai zu nia maw le! Mumang mai ni lovin, a tak ram ni se ka ti thlawt ve thung ta mai le! Ka mumangah chuan ka lehkhabu chhuah tawhho zawng zawnga ka ziakte kha, a tak rama chan theihna kawng a lo inhawng kiau ta mai a. Chu kawnga kal tur chuan mite ka lo hrilh mawlh mawlh mai hlawm zu nia maw le. Chu kawng chu ka kawhhmuh bakah, tun hmaa thil thleng tawha tihsual kan neihte zawng zawng kha, insawiselna satliah ni mai lovin, kawng dika kan kal thiam theih tawhna tur atana a chhe lai leh ngaihnawm lo lai te pawh kha, timna nei map lova ziak tel zel thin ka nih thin thu ka lo hrilh mawlh mawlh mai hlawm zu nia maw le! History zir mi ka ni a. History chuan a tha lam chauh ni lovin, a chhe lam hlei hlei pawh zep nei miah lovin an tar lang kiau mai thin a ni reng lah tak a..

British-India rama pawha awm ve map lo, khawvel ram khawii mah hnuaia pawha awm ngai lo, mahni mum muma mum, mahni tlat tlata tla ve mai, hnam hlim thei tak, Chapchar Kut, Mim Kut leh Pawl Kut hlim taka hmang kum tin thin, lo lama fehnaah pawh lawm inruai dual dual a, nui bawrh bawrh a, zai khawk rum rum a, kuk rawng rawng mai thin kan nih thin zia te chu khuallian ka nihna angin ka thuchah ngaithlatute chu ka lo hrilh mial mial hlawm a. “Doral hlau reng renga ramtuan nilen chu,” tih hla pawh phuah a la nih hma daiha kan pi leh pute nunchan dan kha ka lo hrilh mial mial mai hlawm zu nia. Khawtlang nunho dan kha khawvelah a ang an vang khawp ang. Indo zeuh zeuh chang chu a awm ngei mai lah tak e, mah sela hnam hlim thei tak an nih thin zia kha ka lo hrilh mial mial mai hlawm zu nia mawle! Ka han thangharh a, zing dar hnih a lo ri der tawh mai a, keimah tak pawh chu hlim em ema awm kha, ka mumang a lo ni reng mai a. Han muthilh leh a, ka zantiang tawnmang kha han man zui leh chak ngawih ngawihin, mut pawh mu hlei thei tawh lovin ka meng tlaivar ta thak mai zu nia.

Leave a Reply

Your email address will not be published. Required fields are marked *

error: Content is protected !!