Taxation department-in sum an lak khawm tur bituk hmuh tlin lawm

Aizawl: Taxation Department chuan nimin khan kum 2021-22 chhunga an sum lakkhawm tur sorkarin a bituk zat an hmuh tlin an lawm a. Taxation Minister Lalchamliana chuan khuallian niin a hmanpui.
Taxation Department Auditorium, Aizawlah lawmna inkhawm buatsaihah khuallian chuan thu sawiin, sorkarin a bituk zat a hun taka an lakhawm thei mai piah lamah, sorkarin bituk zat a siamsak nasa taka taxation department-in an khum thei chu lawmawm a tih thu a sawi a. “Pawl leh sorkar hi sum tel loin a kal thei lo a, hna a thawk thei lo a, mipuite sum thawh tlingkhawm atanga sorkar hi a kal a ni,” a ti.
Sorkarin kum kal meka chhiah lakkhawm tura bituk pawh khum theih a nih leh ngei a beisei tih sawiin minister hian, “Tun hnai kum nga chhunga taxation department sum hmuhchhuah dan thlirin an thang nasa hle tih a lang a, a bik takin GST-ah thanna a sang hle,” a ti a. Profession tax-ah erawh an tlahniam deuh thung tih a sawi a, chhiah dik taka pek hlutna mi tinin an hriat a, tha taka zawm theuh a nih theih nan theihtawp chhuah zel turin thawktute leh mipui a fuih.
Kum 2021-22 khan chhiah khawn tur sorkarin a bituk zat chu Rs. vaibelchhe 717.13 a ni a, bituk zat hi Rs. vaibelchhe 177.71 zeta khumin an chhiah khawn zawng zawng tling khawm hi Rs. vaibelchhe 894.74 a ni a, an thanna hi za zelah 32 zet a ni.
GST hman hnuah kum nga chhunga an thanna chu khaikhawmin za zelah 23.8 a ni a. Kum 10 kaltaa an lakkhawm atanga teh chuan kum kaltaa lakkhawm hi 384%-in a tam zawk a ni. Taxation department hian State’s Own Tax Revenue (SOTR)-ah a chhung lut hnem ber bawk.
Taxation department chuan chhiah chi thum – GST, Mizoram Value Added Tax leh profession tax a lakhawm thin a. GST atanga lut hi tam berin, kum 2021-22 chhung khan Rs. vaibelchhe 731.55 a tling a ni. MVAT atangin Rs. vaibelchhe 148.83, profession tax leh a dangte atangin Rs. vaibelchhe 14.36 an lakhawm a ni.

Leave a Reply

Your email address will not be published. Required fields are marked *

error: Content is protected !!