Tlabunga choak pung chak lutuk hnawksak tan

Aizawl: Tlabung khaw chhungah buaipui ngai khawpin choak an hnawksak a, chhungkaw tam tak vawk leh ar vulh lai beih an ching.
Tlabung branch YMA hnuaia Science & Environment sub-committee, Ningani zana thukhawma an tar lan danin tun hnaiah Tlabung khaw chhunga choak an pung chak a, buaipuiawm khawpa an pun chak hnuah mipuiten kawng hrang hranga harsatna an tawh pha.
Chhungkaw tam tak, vawk leh ar vulh lai beih an chin bakah sava note khawih an chin avangin tualchhungah sava an ngampat loh phah niin tar lan a ni.
Science & Environment sub-committee thukhawm chuan choak avanga mipuiin harsatna an tawh mek sutkian a nih theih nan a hnawh bo dan kawng zawn dan tur te an sawiho.
Hei bakah hian Khawthlangtuipui ral lehlama ngaw thenkhat, hnam dangin an duhna lai an suat mai thin chu ngaimawhawm an tih thu leh, tihtawp a nih theihna tura hmalak tul an tih thute thukhawmte hian an sawi.
Plastic leh a kaihhnawh lam chi reng reng hmang lo tura tuipuia intihlim tura kal thinte ngen an rel bakah, ramngaw leh nungchate humhalh a tul thu uar zawka inzirtirna, zirna in hrang hranga buatsaih an rel bawk.

Leave a Reply

Your email address will not be published. Required fields are marked *

error: Content is protected !!