Zothan Autoworks Pro Volleyball League:
Tuichangral an tho lehnghal

Tuichangral in TNT team chak zawn tur dalin hnehna an chang a. Tlawm a bul an tan hnuah Ningani zan Zothan Autoworks Pro Volleyball League-ah 3-1 in an chak.
R Dengthuama Indoor Stadium, Mualpuiah Sahil Kumar chuan set thumna atangin a elpui Vanlaltanchhana aia langsarin a khel a, 25-21, 14-25, 25-21, 25-23-in Tuichangral a chakpui.
An inlan hmasak berah Hunthar nen set nga an inkhelin khaw chhak team an mar tluan zo lo va, TNT lakah an tlawmna chhang letin Sahil chuan point 43 hmuin 17 paih mahse championship kal meka D3 Business Player of the Night lawmman a dawng zawn hmasa ber.

TNT an chak zo lo
TNT-in mittlung takin champion lai Chhinga Veng Spikers lakah league bul an tan a, set hloh lovin an chak. Tuichangral lakah damlohna leh hliam vangin an player tha thenkhat an chhawr mumal thei lo va, set linaah damsamlovin Laldinchhunga lut mahse awmzia an nei thui lo.
Lalruatfela Sailo chuan a vawi khat nan Tuichangral tan a khel a, team tichakin a hma aia inkhairualin an inlan thei. Set hmasa berah Sahil chuan nuam ti takin a khel a, tlakbalna lai nei chunga khel Muanna Veng club-in an el zo lo.
Mahse Kawnpui tlangval Vanlaltanchhana’n set hnihnaah TNT a fuih phur a, a vuak tlak hnuah Sahil-a hlap dang tla lehin 6-1-in hma an hruai. Tuichangral tanhmun a phet a, point 15 chiah hmu ve hmain lehlam an tlang a, inkhel boruak a inthlak chiang hle.
Set thumnaah Buanga leh a kawppui Zosangzuala’n thawh hlawk viau mahse Tuichangral tan Ruatfela’n Sahil-a tha tichakin team a nawr kal a, a bet zawkah Mizo hlanga khel TNT an tang.
Chhinga Veng hneh tawh TNT tan chak zawn turin set hloh a thiang tawh lo va, chutih rualin set thumna thlenga mi mala khel tha ber ni chho char char Buanga a tlahniam ve thung.
Tuichangral tan Hunthar nen an inkhel tuma che tha Saidingpuia a talbuai a, mahse set linaah insangmarin Ruatfela’n hmun ruak a hnawh khat tel bawk. Khawhai spiker Saitea’n chiang taka a vuak tlak hnuah 24-20-in an sang a, TNT-in vawi thum dang zawn leh mahse Sahil chuan chet tha ber a nihna nemnghetin an chakna point a hlap tla.
Lehlam vuak la thei tak Ruatfela’n point kua hmuin vawi hnih a tisual a, Sahil thlawp thei ber niin Saitea’n tum ruk a vuak thlak laiin point kua a hloh ve thung.
Buanga’n Sahil el pha lo deuh mah se point 29 hlawhin 12 a paih a, Pro Volleyball-a a tel hmasak berah Mizo player tha ber ni thei turin a filawr rih hle.
Zosanga’n point 15 hmuh bawkin point nga a paih a, Sadraka Fanai chuan point riat thawk chhuakin paih a nei lo va, mi malin TNT player-te che chhe lo mah se team pum pui inbeihnaah Tuichangral an pha lo deuh a ni.
Tuichangralin kar leh Thawhlehni zanah Durtlang North an khelhpui leh dawn a, Ningani zanah TNT-in an elpui kumhlun Hunthar an hmachhawn ang.

Bethlehem Vengthlang lakah Kanan an tlawm
Bethlehem Vengthlang hmeichhe team-in mittlung takin an khel a, Zirtawpni chawhnu a Zothan Autoworks Pro Volleyball League-ah 3-0 in Kanan an hneh.
R Dengṭhuama Indoor Stadium, Mualpuiah set thum faia Bungkawn laka an tlawm tawhna chhang let nghalin, 25-17, 25-19, 25-14-in Bethlehem Vengthlang an chak a, final beisei ngam turin an insiam thar.
A tel lova Bethlehem Vengthlang an tlawm hnuah Elisian Medai chuan point 24 hmuin vawi nga a tisual a, Pro Volleyball a khelh hmasak berah D3 Business Player of the Match lawmman dawngin team a chakpui nghal.
League an khelh hmasak berah Kananin set thum faiin champion lai Durtlang an hneh a; rin hlawh zui viau mahse team hmasawn Bethlehem Vengthlang an ngam lo va, veteran Vardingliani’n point 14 hlawhin point hnih chiah hloh mahse set an lakpui zo lo.
A tir atangin mi malin Elisian a langsar a, team fuih phurin chiang tak takin ball a vaw tla a; Bethlehem Vengthlangin mar takin inkhel an thunun a, Lalmuanpuii’n point kua a hmuh zat chiah a hloh na a, lehlam vuak laa dangtu ṭangkai tak ni chungin player a fuih phur.
Kawng hrang hrangin Kananin an ngam lo va, Dingi bak innghahna thama che thei an nei loh avangin an khel a nung phak lo va, player-ten point an hloh nasa hle.
Team pali inel zingah vawi khat an inkhelh kual chhuah hnua a sang pahnihin final an khel dawn a. Bethlehem Vengthlangin Durtlang an la khelhpui dawn a, Kananin Bungkawn an hmachhawn dawn bawk

Leave a Reply

Your email address will not be published. Required fields are marked *

error: Content is protected !!