Mingo rawlthar kum 18 mi chuan New York state, United States-a an thenawma mihang awm tamna venga mi a pawng kahah mi 10 a kap hlum a. He thil hi chi inthiarna thil avanga thleng niin thuneitute chuan an sawi.
Buffalo khawpuia supermarket-a Inrinni tlai (India sanaa Pathianni zing lam)-a silai hmet puaktu ber nia hriat, Payton Gendron-a hi man niin court-a inlan tura buaipui mek a ni.
Silai hi dawr kawta lirthei hunna hmunah a hmet puak tan a, a chhungah lut zuiin a kap zui zel a, a che vel lai hi online-in a tichhuak bawk.
US President Joe Biden chuan thil thleng a dem thu leh a nunrawnthlak tak zet tih a sawi.
Buffalo-a FBI pisaa hotu, Stephen Belongia chuan, “He thiol hi inhuatna leh chi inthliarna avanga tih a nih leh nih loh chhui ve ve a ni ang,” tih a sawi a. Hetih rual hian chi inthliarna avanga tih a ni tih erawh finfiahna a awm nual niin a sawi.
CBS chuan a beitu hian silai a hmeh puah pah hian mihangte a huatna a au chhuahpui a, a ralthuamah pawh hetiang lam hi a ziak niin a tar lang a. Online-ah pawh hetiang tawngkam leh ngaihdan hi a tar lang fo niin a tar lang bawk.
A titu nia an puh hian mihang awmna veng thleng tur hian mel 200 vel a inkhalh niin an ngai a. Mi 13 a kah fuh zinga a tam zawk hi mihang an ni.
“A lirthei atangin a chhuak a, ralthuam tam tak a pai a. A lukhumah thlalakna dahin live-in a tichhuak a ni,” tiin Buffalo Police Commissioner Joseph Gramaglia chuan thuthar lakhawmtute hnenah a sawi.
Nasa taka an nawr chep hnuah a inpe a, custody-ah lak niin court-ah hruai a ni a, tualthah thubuai siamsak a ni.
Hliam tuar pathumte chu supermarket-a thawkte niin an nunna atana hlauhawm khawp a ni lo hlawm.
Police officer chawl tawh pakhat, dawr vengtu chuan silai hmet puaktu hi kah a tum a; mahse, ani pawh kah hlum zingah a tel tih police chuan an sawi.
“Eng veng tan pawh mangchhia a ni a, min tina a, kan inching fel thuai ang,” tiin Buffalo Mayor Byron Brown chuan thuthar lakhawmtute a hrilh.
“Kan khawtlang leh ram min thendarh tuma huatna pai mihring hi kan en liam mai lo vang,” a ti bawk.
Inrinni tlai khan New York Governor Kathy Hochul chuan silai hmet puaktu nia puh hi mingote chawi vawn tumtu a nih thu leh mi firfiak ang maia a chet thu a sawi.
Buffalo a tlawhnaa Hochul-i chuan, “Thenawm dawra an mamawh lei tura kalte chu sipaiin a tum renga mi an that ang maia thah an ni,” a ti.
President Biden chuan First Lady nen a tuartu chhungte an tawngtaipui thu a sawi.
“Chi inthliarna avanga pawikhawihna hi a nunrawnthlak a. Hetiang avanga thil thleng titawp tur hian kan thuneihna hmanga kan tih theih ang ang kan ti ang,” a ti.