North Korean hruaitu, Kim Jong-un chuan an rama Covid-19 a len darh ve hnuah hriselna lam thuneitute chu nasa taka sawiselin sipaite chu damdawi sem pui turin thu a pe bawk.
Pyongyang-in ‘khawsik’ tia a sawi vang hian mi maktaduai chuang damlo an awm mek niin an sorkar chanchinbu chuan a tar lang.
Mi 50 vel an thi tawh a; mahse, heng thi zingah hian mi eng zat chiahin nge Covid kai tih erawh hriat mai theih a ni lo.
North Korea-ah hian hri kai leh kai loh endik hi a tlem hle a, mi tlem chauhvin an kai tih finfiah a la ni.
Invenna an la lak ve miah loh avang leh an damdawi in a that tawk loh avangin North Korean tam tak hi hri a leng tak tak a nih chuan an dinhmun a derthawng hle thei tura ngaih a ni a. An ram chhung hmun tam takah inkharkhip puan a ni.
Sorkar chanchinbu chuan Kim-a hian kartawp khan emergency politburo meeting a kaihruai a, hetah hian thuneitute chu an damdawi dah khawl sate an sem chak loh avangin nasa takin a hau niin a tar lang.
An rama thuneihna ngah tak, sipai hnuaia medical corps chu ‘Pyongyang City-ah damdawi ngah tawk a awm theih nan’ che turin a ti bawk.
Mi thiamten a hma pawhin tam tak kai an awm tawh an rinhlelh hle hnuah kar hmasa khan North Korea hian Covid kai an neih ve tak thu an puang chauh.
Kim-a hian emergency puang nghalin inkharkhip leh hna thawhna hmuna pun khawm tam lohte kalpui a ni.
Nikum khan ram dangte chuan North Korea hnenah hian AstraZeneca vaccine leh Chinese siam dose maktaduai tel pek an tum a; mahse, Pyongyang hian hnawlin January, 2020 atanga a ramri a khar hmangin Covid chu a thunun thei niin a insawi.
Tuna hri a darh hnuah pawh South Korea chuan an ngen phawt chuan puih an inhuam thu a sawi tawh a. Heng zingah hian vaccine pek, damdawi lam thiam leh damdawi in hmanruate pek an tum.