Mizoramah Arvind Kejriwal kaihhruai Aam Aadmi Party (AAP) ruangam din tan a ni. Kum thara Mizoram Legislative Assembly inthlanpui lo awm turah candidate neia an hmachhawn nghal dawn leh dawn loh erawh an sawi chiang ngam rih lo.
Mizoramah AAP din tura central-a an hotute chuan organising committee rawn dinin, nimin khan Aizawl Press Club-ah thu thar thehdarhtute an kawm nghal a. He hunah AAP party aiawh hmarchhak bialtu, Rajesh Sharma chuan Mizoramah AAP din tura Mizo thalai eng emaw zatin an ngen hnua a ruangam din niin, member lak beihpui thlak tan a nih thu a sawi.
“Arvind Kejriwal kaihhruai AAP hian tun kum sarih kalta chhung khan Delhi-ah hmasawnna lian tham tak tak thawkin, mi tin chhawr theih tura healthcare kalpui a ni te, mipui tana tui thianghlim in tur chhawpchhuah te, mi rethei zawkte tan kawlphetha chhit man a thlawna pek te, thalai tam tak eizawnna siamsaka hna a thawh a nih hnuah, Punjab-ah sorkar tha din leh mek a ni a. Heng zawng zawngte an hmuh hnuah, corruption hluar avanga state hmasawn hlei thei loa awm Mizorama thalai eng emaw zatin state-ah din ve turin min rawn pan a ni. Mizoram hian thalaite hna thawh tur siamsak te, zirna in tha leh hriselna kawnga inenkawlna tha an mamawh a ni,” Sharma-a’n a ti.
Mizoram district tinah nimin atanga khan AAP zawm duh tan member lak beihpui hi thla khat chhung thlak a nih tur thu a sawi a. Mizoram mipuiten state chhungah AAP din an duh a nih chuan official taka din tan nghal a nih tur thu nimin khan a sawi.
Organising Committee zinga mi, Joseh Biakthianghlima chuan AAP din turin Mizoram district hrang hrangah hma an lak tan mek thu leh district tinah a tlem berah member 50 an hmuh tlin an mamawh thu a sawi a. Mizoramah sorkar tha leh thianghlim duhtu an zawn tur thu sawiin, “Mizoram thalai zingah politic-a sulhnu nei kher lo, ram vei thu tawngkam chauha sawi mai lo leh social media lama post mai duh tawk lo a, a taka pen chhuak ngam thalai huaisen kan mamawh a ni,” a ti bawk.
Organising committee zinga mi vek, Andrew Lalremkima pawhin member atan hian mi mal hamthatna leh hlawkna atana kawra hman tum erawh an ‘welcome’ lem loh thu leh an pawl dinchhan pawh a nih loh thu a sawi a. Politics hi kum upate kian mai loin Mizo mipui, a bikin thalaite chu ram hruaina kawngah ke pen chhuak turin a sawm tih a sawi.
The Zozam Times zawhna chhangin Sharma hian Mizoram mipuiin chuh tura an duh a nih chuan nakkum MLA inthlanah AAP hian general election an hmachhawn tur thu a sawi a. “Member kan neih tam dan azir te, Mizoram mipuiin 2023 MLA inthlan chuh tura min duh a nih chuan general election kan hmachhawn ang. Amaherawhchu, thla khat chhunga Mizoram mipuiin min dawnsawn dan kan thli thlai phawt dawn a ni,” a ti.