Aizawl: Mizoram Pollution Board leh Maubawk Branch YMA tangkawp chuan nimin khan Maubawk veng huam chhungah ‘Awareness Campaign on Elimination of Single use plastic & Cleanliness Drive’ programme an hmang.
Resource person MPCB Secretary C.Lalduhawma chuan tunah hian Mizoram sorkar chuan plastic hman lohin zirtirna kawngah nasa taka tan lain ‘Plastic Waste Management (Amendment) Rules, 2021’ behchhanin plastic hmanga thil siam thenkhat hman, lakluh leh zawrh a khap a, a tiluite chu dan angin Rs. nuai khat emaw, kum khat lungin tan emawa hrem theih an nih thu a sawi.
Sorkarin a ngaih pawimawh leh ram tana tha tur tihlawhtling tura hetianga YMA-in hma a lak zel chuan plastic hi ram pum angin an la hman loh thuai a beisei thu a sawi a, mi tinte chu plastic hmang lova thil dahna atan thil dang atanga siam hmang turin a chah bawk.
Maubawk Branch YMA President Lalrindika pawhin, hetianga awareness cum cleanliness drive hi tih fo an tum thu a sawi a, a bik takin Maubawk veng chu Aizawl chawmtu tlawng lui hnaia awm an nih avangin an side drain te chu tih fai fo a ngaih thu a sawi.
Awareness programme hman zawh ah hian hnatlang te hian insemdarhin vengchhung veng hmun hrang hrang a plastic te an chhar khawm a, heng an plastic chhar khawm te hi Tuirial Dumping Ground ah an paih a ni.