Tripura-a left party-te chuan tuialhthei man sang lutuk duh lohna chu ni kua chhung zet lantir turin inbuatsaihna an kalpui mek.
Tripura-a tuialhthei man sang duh loh lantirna kalpui tur hi ram puma left party-ten an kalpui mek zui vena a ni ang.
Duh lohna hi Pathianni atang khian an lantir tan ang a, June 28 thleng a awh ang.
CPI-M, CPI, RSP, Forward Bloc leh CPI-ML state committee-in tuialhthei man sang duh lohna an lantir dan tur an puannaah a chhan lian tak tak pali an tar lang.
Thuchhuah intawm an siamah state pangaa assembly inthlan a awm chin atangin tuialhthei man hi vawi 23 zet sorkar laipuiin a tihsan tawh thu an tar lang.
“Hei hian kum 11 chhunga a to ber hun lai a thlentir a ni,” an ti.
“Passenger fare leh bungraw phurh man a to va, mi nawlpuiin an tuar a. Tripura-ah chuan tel pawh litre-ah Rs 200 a ni tawh a. COVID-19 thawh hnihna avangin India-ah mi vaibelchhe 1.5-in hna an chân bawk,” an ti.
“Sorkar hian ruahmanna a nei lo va, hma a la lo va, invenna pekah pawh a hlawhchham. Tripura-ah hian hri vangin ni tin mi pasarih thi zel ang an ni a. Covid kaite tan ina inkhung a ngai a, sorkar hian a ngaihsak lo,” an ti.
Left party-ten thil an phut palite chu: sorkar suma invenna pek vek, Covid-19 vanga thi awmna chhungkuate Rs Nuai 10 pek, petrochemical-a chhiah lak tihtawp leh ration-a subsidy lak tihtawp rih te a ni.
Left party hian mipui mamawh leh damdawi man tihhniam an phut bawk.