English Football League Championship final khel tur zawnnaah penalty shootout hmanga chak zawk zawn a ngai a. Nottingham Forest chu a vannei zawkah tangin Sheffield United lakah an chak a. Huddersfield Town nen khawvela inkhel man tam berah an inkhel dawn.
Nottingham khua a The City Ground a inkhel a hmuhnawm a, first leg a 2-1 a chak tawh Forest hi an khingpuiten an barakhaih.
Forest hmahruaina belhchhah turin Brennan Johnson chuan minute 19-naah goal a khung a. Sam Surrridge ball siamsak a thai lut. Mahse Sheffield an ngawi reng bik lo. Second half-ah Morgan Gibbs-White chuan an si phurh a sut a, beiseina thar siam in John Fleck chuan goal a khung belh a. 3-3 aggregate anih hnuah extra-time an khel.
Extra-time ah Forest goalkeeper Brice Samba chuan a team chhanhim in Iliman Ndiaye goal khung tur a dansak a, penalty hmanga chak zawk zawn a ngai.
Penalty an pet
Congolese goalkeeper Samba che tha chhunzawm in Sheffield United penalty hmasa pahnih a dansak a. Ollie Norwood leh Conor Hourihane te penalty a save.
Johnson, Cafu leh Steve Cook ten Forest tan pet goal vekin Joe Lolley chuan a khung lo ve thung a. Mahse Samba bawkin danglamna siam in Gibbs-White lakah a save a. Kum 30 chunga a vawikhatna atan Wembley a inkhelah Forest an inlan dawn.
May 29 a Huddersfield Town nen final an khelh tur hi Forest in an club chanchin a division playoff final hrim hrim an khelh hmasak ber a ni a. An chak chuan Premier League khel tura kum 23 an nghah tawh chu a tawp ang.
Nottingham Forest goalkeeper Brice Samba chuan, “Penalty shootout a ngai kha kei chuan nuam ka ti zawk a, ka goalkeeper coach fak loh theih a ni lo. Ani nen kan thawhrim avangin ka inringtawk hle. Penalty ka save pahnihna kha ka dive loh chhan ka hre lo, mahse ka zawnah a pet dawna hriatna ka nei. Club tan thil ropui tak a ni a, sawi ngaihna ka hre lo.” a ti.