Uruguay chu cyclone-in a ken thli chak tak leh tui fawn sang takin a nuai.
An khawpui, Montevideo-ah tlangval kum 23 mi chu a chenna in thing tluin a delh avangin a thi a, thli hi darkar khatah km 98 zeta chakin a tleh a ni.
Tuipui kama kawngpuite chu tui fawnin a khuh vek a ni.
Cyclone Yakecan an tih hian Uruguay a nuai hnuah hmar lam panin Brazil a lut a, power a awm loh phah nasa hle.
Yakecan hi ‘vanram ri’ tihna niin Guaraní tawng a ni a, a thawh hma hian Uruguay-ah chuan inralrinna sang ber dawt, orange alert tihchhuah a ni.
Thli hian vaukam hnaih leh ram ril deuh thenkhatah pawh in chung a hawk a, thing a chhem thlu nasa hle.
Chanchinbumi, Leonardo Pedrouza chuan tuipui kama awm, chawlh hmanna hmun, Punte del Este chu tui fawnin a khuh vek lai video-te a thehdarh.
Brazil chhim lamah chuan Yekecan-in thing a len thlukin power pekna hrui a tihchhiat avangin chhungkaw 2,20,000 chuangin power an nei lo va. A tuar na ber hi Uruguay hmar chiah, Rio Grande do Sul state-a chengte an ni.
Porto Alegre-a Lake Guaíba-a lawnglenga chhuak mi pathumte chu an thliin an lawng a chhem khup a, . Pa kum 51 mi chu tuiah tlain a chuanpui pahnih erawh vaukamah an inhleuh kai thei.
Brazil-ah hian state eng emaw zatah khua pawh a vawh zual rin a ni a, chhim lama Santa Catarina state-ah chuan vur nasa takin a tla.