Aizawl: Tun lai ruahsurin rel kawng leh motor kawng a tihchhiat avanga Mizorama mipui chakkhai pawimawh lak luh (supply) a tihkhaihlak dan leh mipuiin an tawrh lutuk lohna tura hmalak dan nimin khan Supply Minister K Lalrinliana hoin sawi ho a ni.
Supply department hotute, Food Corporation of India (FCI) leh Indian Oil Corporation (IOC) hotuten minister hi tun lai ruahsur nasain rel kawng leh motor kawng a tihchhiat avanga harsatna thleng chungchang an sawipui.
He huna tar lan a nih danin Mizoramin tuialhthei a lak luhna, Ramnagar Oil Depot-ah petrol a tlem avangin Guwahati atanga phur turin Silchar-ah oil tanker 30 a awm tawh thu sawi a ni a. Eirawngbawlna gas pawh lak luh kawngah harsatna an neih rih loh thu tar lan a ni.
Supply department leh FCI hotute pawhin buhfai chhekkhawl sa atangin mipui hnena ration buhfai pek chhuah kawngah harsatna a awm rih dawn loh thu leh FCI pawhin rel kawng siam that a nih hma chuan lirthei hmangin Mizoramah buhfai phurh luh a ni tur thu an sawi.
Supply minister pawhin a rang thei ang bera rel kawng siam that a nih theih nan union railway minister hnenah a thlen tawh thu leh thawktute pawh tam zawk dan tura a ngen tih a sawi a. Hei bakah external affairs minister hnenah Bangladesh kaltlanga tuialhthei leh eirawngbawl gas lak luh a nih theih nan a rang lama hma lak sak tura a thlen thu a sawi bawk.