Member 193 telna UN General Assembly-a Myanmar sipai ralthuam laka hrek duhtu vote hmanga zawnna nei tura ruahmanna awm sa chu a hun sawn hlat a ni.
UN General Assembly president thupuangtu chuan vote thlak tur hun hi Thawhlehni tur kha a ni a, engtik hunah nge ngaihtuah that a nih dawn tih a la hriat theih loh a ti.
Tihkhawtlai a nih chhan chu he rawtna hi a tlang ngei theihna tura thlawptu a la ngah tawk loh vang niin palai thenkhatin an sawi.
He resolution ruangamah hian Myanmar rama emergency an puanna tihtawp te, lungawi lohna lantirtu mipuite laka hleilenna tihtawp leh November thlaa inthlanna an neih taka mipuite duhthlanna tihhlawhtlinsakte an ni.
Myanmar sipaiten civil rorelna an hnehchhuh hnuah an ramin chhiatna a tawk nasa tawh hle a, mipuiten an thlan tlin, Aung San Suu Kyi leh sorkar mi pawimawh tak takte chu chhuah zalen nghal tura ngiatna pawh a tel.
Sipaite hian November thlaa an ram inthlanna neih chu thil fel lo a awm tih vangin sipai hotute chu roreltuah an inruat a. Election commission erawh chuan inthlan hi dik tak leh dan anga tluang taka neih a nih thu a puang thung.
Nikum February 1 hnu lamah sipaite kutah mi thahnem takin sipai sorkar duh lohna lantirnaah nunna an chân tawh a, ram hruaitute bakah nawrhnaa tel mipuite leh chanchinthar lakhawmtu mi sang chuang tan inah leh hmun dang dangah hren mekin an la awm tih activist-ten an puang.
Sipaite erawh chuan thi zat hi a dik tawk lo niin an puang thung.