India ramah darkar 24 liam ta chhungin coronavirus leng chu mi 2,259-in an kai tih hmuh chhuah leh hman niin mi 4,31,31,822-in an kai tawh.
Union health ministry-in a chhinchhiah dan chuan a kai enkawl lai zat chu tlahniam zelin mi 15,044 an la awm mek.
Darkar 24 liam ta chhung hian mi 20-in hri leng hi thihpui leh hmanin mi 5,24,323-in an thihpui tawh.
Hri kai hmuh chhuah tawh zawng zawng atangin enkawl lai mek hi 0.03% an la ni a, 98.75% erawh enkawl dam an ni tawh tih ministry chuan a tar lang.
Darkar 24 liam ta chhung hian a kai hmuh chhuah aiin enkawl dam tam zawkin mi 375-in enkawl lai hi an tlahniam leh hman.
Darkar 24 liam ta chhung hian sample endik zinga 0.50% chuan hri an kai tih finfiah niin chawlhkar khat liam ta chhunga endik zinga 0.53%-in an kai bawk tih ministry chuan a tar lang.
Hri kai zinga mi 4,25,92,455 chu dama chhuahtir leh an ni tawh a, a kai hmuh tawh zinga 1.22% erawh chuan an thihpui thung a. Health ministry chuan hri leng thihpui zinga a tam zawk, 70% chuang chu a hmaa natna benvawn nei sa an ni hlawm niin a sawi.
Nikum January thla laihawl atanga invenna pek beihpui thlak kal zelah vaccine dose vaibelchhe 191.96 pek a ni tawh.