Rajasthan-a Barmer district sorkar damdawi inah, nau neihna pindanah hmeichhe naupang kum 14 mi pawngsual a ni.
Pawngsual tawk tleirawl hi a pum na inentir tura damdawi in pan a ni a. A titu hian a thla laksakin video a la bawk niin police chuan an sawi.
Gudamalani police station-a station house officer Mularam Choudhary chuan he thil thleng hi a sawi chhuak.
Tleirawl hi Udaniyon Ki Dhani khua, Gudamalani police station huam chhunga cheng a ni a. A nutapa nen a pum na inentir turin an kal a. Mi an lo tam em avangin an nghah chhungin a nutapa hian a bul lawka bazarah mamawh a lo lamsan a ni.
Pawngsualtua puh hi Nasir Khan a ni a, a hma atang tawhin tleirawl nen hian an inhmelhriat sa tawh a. Nau neihna pindanah hian a ko lut a, kut a thlak a, chemte nena vauin a pawngsual ta a ni.
A thlalak leh video a laksak a, a chunga a thiltih chu a sawi chhuak a nih vaih chuan video chu social media-ah thehdarhin a that bawk dawn niin a sawi.
Police-in an sawi dan chuan ina an haw hnuah a nu a hrilh nghal a. Police chuan May 16-a thleng kha niin an sawi a, a tirah hian an chhungkua hian sawi chhuah loh mai an tum zet a; mahse, Zirtawpni khan tual chhung police hnenah kalin thubuai an ziak lut ta a ni tih an sawi.
Police hian thubuai pawh an ziak lut nghal a, IPC section eng emaw zat leh POCSO Act hmangin thubuai hi siam a ni a, a titua puh hi man a la ni lo va, a awmna chin an la hre lo.