Kum 1988 daih tawha thil thleng avanga kum khat lung in tang tura hrem, cricketer atanga politician ni ta, Navjot Singh Sidhu chu Zirtawpni khan Patiala-a chief judicial magistrate hnenah a inpe.
Minister hlui, Punjab Congress chief pawh lo ni tawh hi Ningani khan Supreme Court chuan kum thum kal taa Rs. 1,000 chawi tura a lo hrem tawhna thubuaiah hian thiam loh chantirin kum khat lung in tang turin a ti a ni.
Sidhu-a hian Zirtawpni chawhnu dar 3.50-ah a in chhuahsanin amah thlawptu eng emaw zatin an zui chungin court complex a thleng a. Judge hnenah inpein ani hian tan ina khung tura buaipui ngaite a buaipui zui.
Sidhu-a hi tang tharte an dah fona thin, Patiala central jail-ah dah hmasak a nih a rinawm a. Zirtawpni vek, zing lamah Punjab Additional Director General of Police Verinder Kumar chuan he tanin hi tlawhin venhimna lamte a enfiah tawh a ni.
Police officer hian venhimna lama inbuatsaihnate thlirin mi tang zinga mi chu tu pawh ni sela duhsak bik an awm theih loh thu pawh a sawi.
A hnuah Kumar-a’n tan in a tlawh hi tih dan thin pangngai a nih mai thu thuneitute chuan an sawi a, Sidhu-a lo pawh he tan inah hian mi langsar tak tak tang an awm ve tho niin an sawi a. Sidhu-a hmelma lian ber pakhat, Bikram Singh Majithia pawh Patiala jail-ah hian a tang mek a ni.
Sidhu-a hi tlema inpek tlai deuh tum a ni a, dan hre mi hlun, Abhishek Manu Singhvi chuan Zirtawpni chawhma lam khan Supreme Court hnenah hriselna dinhmun avangin hun tam zawk pe turin dil mah se Chief Justice of India NV Ramana chuan dilna hi a hnawl.
Ningani khan CJI Ramana-a kaihhruai judge pathum awmna bench chuan Congress hruaitu hi 1988 road rage case an tih maiah kum khat lung tang tur hian a hrem a ni.