Covid-19 hripuiin a nuai thar ve mek nia hriat, North Korea chuan tun thlengin puih huama dawrtu ram an neihte an la hnar zel.
An ram mipuite zingah invenna la pakhat mah an la awm lo va, rei tak an ramri an khar tawh avanga an mamawh an chawk luh theih loh avangin an ei leh in a chhia a, tam takin an khamkhawp an ei lo va. Hengte hian hri hi mi tam zawkin an thihpui mai hlauhna a lian hle.
Hei bakah hian an damdawi inte a tha lo va, damdawi tul zual leh hmanrua pawh indaih leh innghahna tlak an nei lo.
Covid-19 a darh mek tih an puan hnuah Pyongyang hian ram dang atanga puih inhuama dawrtu nei tawh mah se tun thlengin an la aw lo.
United States leh South Korea chuan puih an inhuam thu an sawi tawh a; mahse, chhan letna an la dawng lo ve ve a. Ram pahnihte hian a tul a nih chuan puihna thawh an inhuam em em niin South Korean thuneitute chuan an sawi.
‘Nasa taka a darh’ hlauhpui em emtu, World Health Organization pawhin hri leng dinhmun dik tak an zawhna chu a chhanna an la dawng lo bawk.
UNICEF chuan Ningani khan ‘thawktute an him theihna tur leh hri kai an tam lutuka lo buaipui dan tur’-ah rawtna siamin biakpawh an tum a, hei pawh hi he rama an thawhpui awm mekte an be tlang thei lo.
North Korea hian January, 2020 khan an rama roreltu, Kim Jong Un-a thupekin khawvela hri leng avangin an ramri an khar a, ramri khar hmasa ber zinga mi a ni a. Khawvel hmun hrang hranga a kai tam buaipui a nih lai leh invenna pek buaipui a nih Pyongyang chuan chuan vaccine pek tuma dawrna a hnar zel.
Kar hmasa thleng khan COVID-19 kai an la awm lo niin an sawi reng a; mahse, mi tam tak chuan inkai awl tak, an thenawm, China-a nasa taka buaipui ni bawk kai an awm ve lo chu an awihsak lo hle.
Kar hmasa tawp lamah khan hri kai an awm tih an puang ve ta a, a hnuah a natna anga khawsik tam tak awm zuiin mi maktaduai 2.2 vel zet hetiang hi an awm a; mahse, an zinga COVID-19 kai finfiah zat erawh hriat theih a ni lo.