NABARD Warehousing Scheme (NWS) 2013-2014 atanga Rs. nuai 151 senga buhfai quintal 2000 (200 MT) dah theihna tur Khawbung Supply Kudam leh staff quarters sak thar chu Inrinni khan Supply Minister K Lalrinliana’n a hawng.
Supply Minister chuan Khawbung Supply Kudam chu buhfai quintal 3000 (300 MT) dah theihna tura a tul anga zauh leh tur a nih thu a sawi a. “Mizoramin buhfai kan lei kan dahkhawl zingah kan thar chhuah pakhatmah hmuh tur a awm lo hi tan kan lak a tul tih lantirtu a ni” tiin, intodelh tura rilru siam a tul thu a sawi.
K Lalrinliana chuan kudam a thatloh chuan buhfai chhia a tam thin nia sawiin, a dawngtu tur ten an dawn kim loh bakah sorkarin sum tam tak a seng thlawn thin tih a sawi a. Mizoram sorkarin kudam tha leh him neih a ngai pawimawh thu a sawi bawk.
Sorkar thuchhuahin a tarlan danin Khawbung Kudam leh staff quarters sak hna hi Babie construction & consultancy services (BCCS), Khatla, Aizawl-in thawkin, November ni 20, 2020 ah sa tanin February ni 25, 2022 khan an sa zo a ni.
Khawbung Supply centre hnuaiah hian ration card 947 awm- in mihring 4231 an awm a. Ration card hrang hrang – AAY 130 (mihring 351); PHH 588 (mihring 2834) Non NFSA 229 (mihring 1046) an awm. Khawbung supply centre hian thla tin buhfai quintal 270.68 (AAY 45.50 qtls, PHH 141.50 qtls, Non NFSA 83.68 qtls) a mamawh a, PMG- KAY hnuaiah thla tin buhfai quintal 159.10 (AAY 17.60 qtls, PHH 141.50 qtls) a mamawh bawk.
Khawbung Supply centre hnuaiah hian buhfai pek chhuahna Fair price shop 5 awm mekin, Khawbungah leh Khuangthing khua ah Fair price shop pahnih ve ve a awm mek a, Zawlseiah Fair price shop pakhat a awm mek bawk a ni.