- Ruata
Mahindra Scorpio thar tur hi a hma pawhin ka lo thailang tawh a. Eng angin nge a lo chhuah ang a, eng hming puin nge a lo chhuah ang tih kan hriat hleihtheih loh laiin Mahindra chuan chet rawn lain an rawn pholang ta a. Reiloteah Mahindra Scorpio N, design thar deuh hlak nen kan hmu dawn ta a ni.
Scorpio thar tur hi a codename-ah Z101 tih an vuah a. Tunah hian a thlalak chiang zawn leh a nih dan tur kimchang chu Mahindra in an tlangzarh tak tak hmain an rawn phochhuak ta a, a mawi viau mai a, hetihlai hian tuna chhuak mek Scorpio ang pawh hi a la chhuak reng ang a. A thar tur hi Scorpio N an ti deuh bik dawn a, thlaleh ni 27 hian an tlangzarh beisei a ni.
Mahindra Scorpio N hi a lo chhuak a nih chuan Scorpio ro roah a chhuan thumna, 3rd generation model a ni tawh dawn a. He lirthei thar turah erawh hi chuan a hmaa kan ko tarlan tawh angin a design an rawn thlak deuh hlawk mai a, Scorpio lo chhuak tawh thin ho nen erawh eng emaw chenah a la inzul viau tho a ni.
Report hrang hrangin an tarlan danin Scorpio thar hi a hma aiin a khawl a chak zawk ang a, kentel hmanraw hrang hrang pawh a ngah zawk dawn a. Mahindra chuan D segment SUV category ho bikah danglamna thlen an tum thu an sawi a, Scorpio N lo chhuak tur chu an lirthei leitu kum naupang lam, tunlai thiamna hmanrawn changkang hrang hrang ngainatute tan a ni zual bik dawn niin an sawi a ni.
Mahindra chuan Scorpio N lo chhuak tur hi petrol leh diesel khawl hmang duhthlan tur a awm dawn niin an sawi chiang tawh a. Transmission lamah pawh manual leh automatic a awm dawn a, hei bakah hian 4×4 drivetrain chu duhthlan turin an chhawpchhuah hmel bawk a ni.
Scorpio thar tur hi body on frame platform tho, a thar nghahchhana duan tur a ni a. A khawl lamah hian beisei dan chuan 2.0 litre mStallion petrol khawl leh 2.2 litre mHawk diesel khawlte duhthlan tur a awm ang a, a man tlawm hoin petrolah hian 200bhp power pechhuak thei 130bhp power pechhuak thei a awm ang a. Diesel khawl hian 185bhp a pechhuak thei dawn bawk a ni.
2022 Mahindra Scorpio N hian ADAS (advanced driver assistance system) a neih beisei a ni a. A kentel hrang hrang tur zingah hian 8-inch touchscreen infotainment system, wireless Apple CarPlay & Android connectivity awm tel, 360 degree camera, digital instrument cluster, electrically adjustable seats, connected car technology, panoramic sunroof, flat-bottom steering with mounted controls, automatic climate control with third row AC vents leh a dang dang a awm dawn a ni.
Scorpio N lo chhuak tur hi 6 leh 7 seater te duhthlan tur a awm dawn a. Scorpio hlui ang lo deuhin a thutna tlar hnung ber hi a hmalam hawi a ni dawn a ni. Himna hmanraw lamah chuan airbag 6 emaw 7 emaw bakah , electronic stability programe, hill hold assist, hill descent control, traction control system leh tyre pressure monitoring system te a awm dawn a ni.
Tuna chhuak mek nena a danglamna thenkhat chu vertical slat grille a nei ang a. Heng bakah hian double-barrel headlamp design chrome underlining awm tel, Mahindra SUV ho logo thar te, a lirthei pangah body cladding with silver inserts, 18-inch alloy wheel design thar hlak, faux skid plate, silver finish nei leh side-hinged tailgate design thar te a awm dawn a ni.