Aizawl Municipal Corporation (AMC)-in Solid Waste Management Centre-a bawlhhlawh tawih thei atanga lei tha (AMC compost) an siam an hralh chhuak tan.
Thawhlehni khan lei tha hralh turte hi AMC Mayor Lalrinenga Sailo-in |huampui atangin a vai liam.
A vawi khatna atana AMC-in lei tha a siam chhuahte hi Kolasib tlangdunga mite hnena hralh tura tih a ni a. Hralh chhah hmasak ber hi bag 100 (15 kg leh 25 kg) niin, a vaiin kg 2,000 a ni.
AMC-in lei tha an hralh chhuah hmasak ber vai liam hun puala Thuampuia an pisa-ah inkhawm tawi neih a ni a. He hun kaihruaitu AMC Executive Councillor Laltlanzova Khiangte-in a sawi danin AMC-in January 20, 2022 atangin Solid Waste Management Centre an enkawl tan a. He centre-a bawlhhlawh tawih theite lei thaa siam turin Waste Tech and Bio-Energy, ramhlun North te an thawhpui a ni.
Laltlanzova Khiangte chuan, “Lei tha hi reilo teah AMC office-ah pho chhuah a ni dawn a, a duh apiang tan a lei theih dawn a. Kg 15 bag hi Rs 150 man a ni ang a. Kg 25 bag hi Rs 250 man a ni ang,” a ti.
Aizawl Mayor Lalrinenga Sailo pawhin thu sawiin, “AMC-in Solid Waste Management Centre enkawl nan duhthusamin man power leh sum leh pai a nei lo a. Mawhphurhna pek kan nih bawk si avangin chona-ah ngaiin bawlhhlawh sawngbawl mawhphurhna kan la a ni,” tiin, bawlhhlawh atanga lei tha siamte a taka hmuh theih a ni ta leh hralh chhuah theiha a awm ta chu lawmawm a tih thu a sawi.
AMC lei tha hi a hmang tawh chuan a tha an tih zel thu leh amah ngei pawhin a enchhin hnuah tha a tihzia thu sawiin, “Laboratory-ah pawh test thlap a ni a, lo neitu leh lei tha mamawhtu zawng zawngte tan tangkai tak a nih ka beisei a ni,” Aizawl Mayor hian a ti bawk.
|