Boston Celtics in anmahni court-ah game 3 an hloh hnuah chetsual nawn an tum lo. Thawhlehni zingah inkhel an tan phat atang Miami Heat chu hneh taka rep in point sawmhnih in an sawp a. 102-82 in NBA Playoffs Eastern Conference Finals game 4-ah an chak.
Celtics tan All-Star Jayson Tatum a che tha fal a, point 31 score in first half-ah an team tana point score tu berah a tang.
Celtics hian first quarter-ah 26-4 a hma hruai nghalin a tawp thlengin harsatna an nei zui lova, an inkar a zauh avangin Miami in an tibuai zo tak tak lo.
Team inkhai rual tak pahnih ni tura ngaih an ni a, mahse tun Finals series kal danah team pahnihte an la inchetthat chhawk.
Heat in game 3-ah first quarter-ah 39-18 in hma an hruai a, tun tumah erawh an chetbuai hun ni ve thungin an ball shoot hmasak 16 atang vawi 15 an thelh.
Boston coach Ime Udoka chuan, “Kan tlawm hnua kan thawhlehna rilru bawk kha kan chak hnuah pawh chak nawn leh tura kan chhawm nun a ngai.” tiin a sawi.
Celtics tan Payton Pritchard leh Derrick White ten point 14 leh 13 an thawh a, White hian rebound vawi 8 leh assist vawi 6 a nei a. Marcus Smart awm loh karah Robert Williams chuan defense fakawm taka khelin point 12 a thawh bawk.