Jammu & Kashmir-ah mi firfiakten police an kap a, a hnuah a thi zui a, a fanuin hliam a tuar bawk.
Police hi Soura (Anchar)-ah kah a ni tih police chuan Thawhlehni tlai khan Twitter-ah an tar lang a. Amah hi Saifullah Qadri a ni.
J&K Police hian kah a nih thu an tar lan hnu lawkah a hliam tuar lovin a thi tih an tar lang zui leh a. “Police kah hi a hliam tuar lovin a thi a, a martar ta a. Martar hi kan zahin an hun harsaah hian an chhungte kan hre reng a ni,” an ti.
Thuneitute chuan a fanu hliam tuar erawh a dinhmun a ngaihtuahawm loh niin an sawi.
Thawhlehnia thil thleng hi tun hnai lawkah sorkar hna thawk pakhat, Budgam district-a Chadoora-a mi firfiakten an kah hlum hnu lawka thleng a ni.
Sorkar hnathawk Rahul Bhatt-a thahnaah hian Pakistan-a hmunpui nei, khawvel huapa mi firfiak pawl, Jaish-e-Mohammad an inhnamhnawih ngei a rinawm niin police chuan an sawi.
Thawhtanni khan police chuan Baramulla district-a khaw roreltu, sarpanch thahnaa inhnamhnawih nia an hriat mi pathum an man thu an sawi a. Police leh sipai tanghoten an chhuina leh thu an dawn bawh an zuina atanga man an nih thu an sawi.
J&K police thupuangtu chuan heng mi mante kut atang hian Chinese pistol pathum, a magazine pathum, grenade pahnih leh pistol mu 32 an man tel thu a sawi.