Kum 2021-ah Covid-19 avanga inkhuahkhirhnate thlahdul a nih karah mi tihhlum a pung nasa hle niin Amnesty International chuan a sawi a, a bikin Iran leh Saudi Arabia-ah a tam zual.
Human rights group hian kum 2021 chhung hian ram 18-ah mi tihhlum 579 vel an awm thu leh a hma kum aiin 20% zeta an tam thu a sawi.
Iran chu kum liam ta chhunga mi tihlum tam ber a ni a. Mi 314 vel tihlumin a hma kumah mi 246 an tihlum thung.
Saudi Arabia pawhin a hma kuma an tihlum leta tam tihlumin mi 65 zet an tihlum bawk.
Amnesty hian kum 2010 vel atang khan mi tihhlum zat hi an chhinchhiah tan a, kum 2020-a tihhlum zat dawtah kum 2021 kha a tlem ber tum a ni thung.
Tun hma lamah chuan China-in a tihhlum zat chhiar tel a ni ngai lo va, rin danah chuan mi sang chuang mah an tihhlum thin rin a ni a, thi tura mi tih hi an ram sorkar thuruk a nih avangin hriat mai theih a ni lo.
Amnesty hian North Korea leh Vietnam-a mi tihhlum zat pawh finfiah a harsat thu leh eng emaw zat chu an tihhlum a rinawm thu an sawi.
Amnesty-in kum tina thi tura hremte tihhlum zat report a siamah hian Iran hi kum 2017 atangin an pung chak hle a, hei hi ruihhlo kaihhnawiha mi an mante an tihhlum thin tak vang a ni.
Mihring dikna chanvo humhalhtu pawl hian heti taka mi tihhlum a pung hi ‘khawl dan bawhchhiatna, tum reng vanga mi thattute chunga lek thin bawhchhiatna’ niin a sawi.
Saudi Arabia-a a hma kum aia nikuma tihhlum 140% zeta a pun chhan lian ber nia Amnesty-in a sawi chu March thlaa ni khata mi 81 tihhlum an ni kha a ni.
Somalia-ah pawh a hmaa mi 11 tihhlum atangin 21-ah a kai a, South Sudan-ah pahnih atangin pakuaah leh Yemen-ah panga atangin 14-ah tihhlum an pung bawk.
Report-ah hian Covid inkhuahkhirhna a tawp rualin judge-ten mi thi tura an hrem pawh a pung niin an sawi a. Kum 2021 khan ram 56-ah mi 2,052 vel thi tura hremna pek niin a hma kum aiin 40% dawnin an tam.