Odisha-ah naupang 26 chuan kut (hand), ke (foot) leh ka (mouth) natna (HFMD) an vei mek a, an dinhmun erawh a ngaihtuahawm loh niin hriselna lam thuneituin Thawhlehni khan a sawi.
‘Tomato flu’ tia an sawi mai thin, natna inkai theih hi naupangah a vei an tam zual thin a. Puitlingah chuan an taksa ralveng sipaiten an lo hneh mai theih avangin a vei an awm ngai meuh lo.
A vei tam zawk chu an khua a sik a, an ka leh hrawk a ro em em a, an kut, ke leh mawngtam a thak/za thin niin World Health Organization chuan a sawi.
Regional Medical Research Centre, Bhubaneswar-a sample 36 endik zinga 26 chuan he natna hi an vei ngei tih finfiah a nih thu Health Services Director Bijay Mohapatra chuan thuthar lakhawmtute a hrilh.
HFMD vei mek zinga naupang 19 hi Bhubaneswar-a mite an ni a. Puri leh Cuttuck-ah mi pathum ve ve an ni.
“Naupang kum khat leh 9 inkar vek niin ni nga atanga ni sarih chhung dah hran an ni phawt ang,” a ti.
An vai hian an dinhmun a tha a, ngaihtuahawm an awm lo va, ngun takin doctor thiamten an vil reng tih a sawi.
Tun thla tirah khan Kerala-a Kollam district-ah naupang 80 chuangin an vei tih hmuh a lo ni tawh bawk.