Quad ram hruaitute chu Thawhlehni khan Tokyo-ah an thukhawm ta a, heng ram zinga tel ve lo, China chu Indo-Pacific huang chhunga a chet velna avangin sawi lansarh ber a ni.
Tun tum thutkhawm hi tun hnaia Indo-Pacific huang chhunga venhimna thil leh a dang danga thil thleng avangin intawh khawm pawimawh ber pakhat a ni.
Japan, United States, Australia leh India telna pawl hian Covid-19 hripui leng a reh hnuah intuai thar dan tur bakah Russia-in Ukraine a rûn chungchang pawh an sawi ang.
Tun tum hi kum hnih pawh tling lo chhunga ram pali hruaitu lawkte an inbiak vawi lina a ni tawh a. Nikum September khan Washington-ah an thukhawm a. Ral atangin vawi hnih an inbe tawh bawk a. Quad hi kum 2017 atang khan indin tan deuh an ni.
Hetih hun laia US president, Donald Trump chuan China-in huang a zauh chak lutuk nawr letna atan leh dan nana a tihnun a ni.
Mi thiamte erawh chuan Quad ramten China an hlat hret hret chuan anmahni theuhvah hlet tha lo dang pawh a nei niin an ngai.
Wilson Center think-tank-a deputy director Michael Kugelman chuan tun tum inbiaknaah hian Indo-Pacific chu an thu khel tur lian ber a nih a rinawm thu a sawi.
“Hripui a liam a, Ukraine laka India dinnaah inhriat thiam tawnna a awm a, Quad hian Indo-Pacific huam chinah sumdawnna zau leh inhawng lam pawh an sawi ang,” a ti.
India hian Russia-in Ukraine a rûn chungchangah Moscow demna a sawi duh lo va, mi rama inrelbawl dan erawh inzahsak a that thu a sawi.
India dinna hi US leh khawthlang ramten dem hle mah se tunah erawh Delhi dinna hi an hre thiam tawh.
2+2 Dialogue an tih, US leh India foreign leh defence minister ve vete April thlaa an inbiak chuan Ukraine chungchanga an ngaihdan inan lohnate an inpawmsak tawn a ni.
US hian ralthuamah chawk luh nan Russia-a India-in innghah dan hre tawhin Delhi ngaihdan hi a pawmpui a ni.
Inrem lohna awm a reh avang hian Quad-ah hian China chu an khel len ber a nih hmel.
China hi a bul hnai vel ramah hian a che na hle a, tuipuiah a thenawm ramte nen an innghirngho reng a, India nen ramri-ah an buai reng bawk.
Beijing hian a tuipui sipaite thuam chakna turin sum tam tak a dah a, tun hnaiah ram venhimna lamah Solomon Islands nen inremna siamin hei hi Australia duh loh tak a ni. Inremna an siam, Australian sorkarin a finfiah tawhah chuan Chinese indo lawngte chu thliarkar ramah hian an inhung dawn a, Beijing hian venhim hna thawktute chu thliarkarah hian an tir lut dawn bawk.
Australia prime minister thar, Anthony Albanese chuan tuna an ram tana hlauhawm ni thei thar awm hi Quad-ah hian engtin chiah nge a sawi chhuah dawn hriat a la ni rih lo.
Japan pawh hi an ram chinah Chinese navy nen an intibuai zeuh zeuh fo bawk.
Inbiak laiin Russia leh China thlawhna
Thawhlehnia Quad ram hruaitute intawh khawmna bul hnai lawkah hian Chinese leh Russian indo thlawhnate chu an thlawk kual niin Japanese defence minister chuan a sawi.
Nobuo Kishi chuan sorkarin he thil thleng hi a ngai thutak hle tih a sawi bawk.
Thlawhnate hian an ram chin chu an dai lut chiah lo niin defence ministry chuan AFP a hrilh a, tun hi November hnu lama ram hla tak, Russia leh China atanga Japan hnaiah an indo thlawhna an thlawh vawi lina a ni tawh.
“Chinese bomber pahnih chu Russian bomber pahnihin lo zuiin Sea of Japan-ah an thlawk a, East China Sea velah an thlawk a ni,” tiin Kishi chuan thuthar lakhawmtute a hrilh.
“Hemi hnuah hian thlawhna pali, pahnih chu Chinese bomber thar ni ngeia hriat chuan a hmaa Chinese bomber pahnih rawn thlakin Russian bomber pahnih nen East China Sea atangin Pacific Ocean lamah an thlawk leh a ni,” tiin a sawi bawk.
Russian intelligence-gathering aircraft pawh Thawhlehni vek khan Hokkaido hmar lam atangin Japan lailia Noto Peninsula-ah a thlawk niin a sawi bawk a. “Hengte hi Tokyo-a intawk khawm mekte tihthaihna thil a ni chiang a ni,” a ti.