Congress thalai chuan an president Dr Lalmalsawma Nghaka hoin dam lote hmuh let tur, medical reimbursement (MR) bill pek theih loh avanga Mizoram mipuite harsatna tawh chungchangah Mizoram Health Care Society (MHCS) pisa tlawhin thawktute an sawipui.
Nilainia MHCS pisa an tlawhnaah thu sawiin MPYCC President Dr Lalmalsawma Nghaka hian, tun sorkarin damlote pawisa bill a bat zat hi MPCC secretary Lalhruaitluanga Bawitlung-in RTI atanga a zawhna chhanna atanga a lan danin April 30, 2022 thlengin Rs 712,184,104 a nih thu a sawi a. “Kan thu dawn danin, health care lama thawktute chuan theihtawpin health care-a bill tang mekte chu umzuiin, finance leh planning-ah te an nawr ve reng a; mahse, sum harsat avangin hmasawnna erawh a awm hlei thei lo, an ti a ni,” a ti.
Dr. Lalmalsawma chuan Mizoram budget pung tual tualin chhiah hrang hrang atanga sorkara sum lut pawh nam loa nasaa a pun mek laiin, mipuiin inhumhimna leh invenna ve atana health care-a ain inziah luh thlap hnu leh, a premium te pe a, anmahni lama an tih tur tifel vek chunga hun rei tak an bill a tang avanga harsatna an tawh phah hi vanduaithlak an tih thu a sawi.
“Planning lam leh Finance Dept. lam pawh an mangang tih kan hria a, Non-Plan Expenditure a sang lutuk vang tih a chiang hle. Kan finance minister, chief minister ni bawk hian Mizoram mipui min hlawhchham pui hneh hle tih a chiang a, speaker lar takin a sawi, ‘Titi-a distinction’ ringawt ni lo, hna thawk thei tak tak tur CM Mizoramin kan mamawhzia a tichiang leh zual a ni,” Congress Thalai president-in a ti.
MPYCC president hian health care bill-a Rs vaibelchhe 71 chuang lai la tang hi a rang lama sorkarin ching fel tura an phut thu a sawi bawk.