Central Young Lai Association (CYLA)-in Doctor sawnna thupek sut tur leh doctor dah belh tura sorkar kar nan nimin khan Lawngtlai leh Bungtlang South-ah pisa, zirna in leh bank kal turte an dang a. Sorkar atanga thu lawmawm an la dawn loh avangin lungawilohna lantir hi an chhunzawm dawn nia thudawn a ni.
CYLA-in lungawilohna an lantir avang hian nimin khan Lawngtlai District Bawrh- sap pawhin pisa a kai lova, LADC-a CEM V. Zirsanga leh Executive Member te pisa kai tur pawh YLA duty te ngenna avangin an kir leh.
Tarlan tawh angin Mizoram sorkarin tun thla ni 20 khan Lawngtlai district hospital-a doctor pahnih sawn- na thupek tichhuakin, tun thla vek ni 23-ah he damdawi in-a thawklai bawk doctor dang pahnih sawnna thupek a tichhuak leh a, hemi rual hian midang pathum Lawngtlai district hospital-a dahna thupek a tichhuak tel bawk.
CYLA hruaitute chuan Mizoram sor- kar thil tih dan chu an duh loh thu sawiin, Lawngtlai District Hospital atanga doctor sawnna thupek chu suta, doctor dah belh zawk turin sorkar an ngen a. Sorkara an ngennain awmzia a neih mai loh avangin Lawngtlai leh Bungtlang South-ah pisa, zirna in leh bank kal turte an dang ta niin an sawi.
Lawngtlai District Hospital-a doctor indaihlohna a nasat thu chu Chief Minister Zoramthanga hnenah ziak leh tawngka paw- hin an thlen tawh thu leh doctor pali – Gynaecologist, Pediatrician, General Surgeon leh Eye Specialist te dah belh tura ngenna pawh an thlen tawh thu CYLA hruaitute chuan an sawi a. Doctor indiahlohna avanga doctor dah belh tura an dil mek laia a awmsa pali sawn chhuaka, midang pathum dahluh an ni chu district mipuite zahlohnaa an ngaih thu leh hriatthiam theih a nih loh thu sawiin, an hlawhtlin hma chuan an thiam dan anga hmalak chhunzawm zel an tum thu an sawi bawk.
Thawktu indaihlohnate sawifiah
Tunhnaiah doctor 20 vel lakna tura hmalak tum a nih laiin, court case avangin hmalak chhunzawm theih a ni ta lo niin sorkar thuchhuahin a tarlang a, hei hian harsat- na nasa tak a thlen niin a tarlang bawk.
Sorkar thuchhuahin a tarlan danin, thla ruk kalta chhungin superannuation pension-in doctor sawm chuang an chhuak a, zirna sang zawk chhu- nzawm turin doctor thawklai sawm chuang bawk an chhuah a ngai bawk a. Heng te avang hian PHC leh hospital hrang hrangah doctor indaihlohna a nasa a ni.
Doctor post ruak tam tam tak hnawhkhat turin sorkarin hma la reng mahse, harsatnate chinfel a harsa hle niin sorkar thuchhuah chuan a tarlang a. Doctor nei lo khua, mipui leh pawl te pawh dawhtheihna nen hrethiam turin an ngen.
Sorkar thuchhuah chuan Mizoram sorkarin health sector lam tihchangtlun a ngaihpawimawh avangin kum 2019 atangin Health deptt-a doctor leh post dang hnawhkhat turin hma a la a, Chief minister pawhin hna lak phalna a pek tawh laiin hri lengin a nang a, hna lak kalpui theih a ni ta lo niin a tarlang bawk.